Փաստ ինֆո

Նման հաղորդումը ժողովրդավարական երկրում ներքաղաքական դեբատի առիթ է դառնում, և ես շատ ուրախ էի, որ Հայաստանը բացառություն չէ։ ԱԳՆ-ում լրագրողների հետ հանդիպման ժամանակ ասաց ԱԳ նախարար Զոհրաբ Մնացականյանը՝ խոսելով BBC-ին տված իր հարցազրույցի մասին։

«Ուրախ եմ, որ Հայաստանում կարծիքների բազմազանություն կա՝ գոյություն ունի քննադատություն և աջակցություն։ Ինձ ուղղված քննադատության մեջ կար նաև կառուցողական քննադատություն, որտեղ առկա էին օգտակար կարծիքներ»,-ասաց արտգործնախարարը՝ ընդգծելով, որ Hard Talk հաղորդմանը հյուրընկալել է՝ ուղղվածությունը և ոճն իմանալով։

Զոհրաբ Մնացականյանը, անդրադառնալով այն մեղադրանքներին, թե չի արձագանքել հաղորդավարի այն պնդմանը, որ Արցախը Հայաստան չէ, ասաց. «Լեռնային Ղարաբաղի հարցը դա տարածքային վեճի հարց չէ, մեզ համար սա անվտանգության և կարգավիճակի հարց է։ Եվ այստեղ մեզ համար առաջնային մեր մտահոգությունը վերաբերում է մարդուն՝ իր անհատական և հավաքական իրավունքներով։ Մենք եղել և մնում ենք Արցախի անվտանգության երաշխավորը։

Այս ուղերձը եղել և մնում է այն հիմնականը, որը տարբեր առիթներով, տարբեր ձևաչափերով, տարբեր մեթոդներով շարունակելու ենք ամրապնդել։ Իմ առաջնային խնդիրը եղել է մաքսիմալ սփռել այն, ինչ մեզ համար առաջնային է»,-ընդգծեց ԱԳ նախարարը։

Հեղինակ` Հասմիկ Կոշկարյան