Փաստ ինֆո

«Նիկոլի վիճակը բավականին բարդ է, ուշադրություն դարձրեք, ես չասացի Նիկոլ Փաշինյանի, ես ասացի՝ Նիկոլի։ Այդ վիճակից դուրս գալու համար նրան պետք են նորանոր ինտրիգներ, իսկ լավագույն ինտրիգներցի մեկը Ձեր նշած փաստն է։ Սա հեռուն գնացող վտանգավոր նպատակներ է հետապնդում»,-«Փաստինֆո»-ի հետ զրույցում ասաց ԱԱԾ պետի նախկին տեղակալ Գուրգեն Եղիազարյանը՝ անդրադառնալով այն հարցին, թե ի՞նչ նպատակներով է Հոկտեմբերի 27-ի ոճրագործության պարագլուխ Նաիրի Հունանյանին քաղաքական գործոն դարձնելու փորձ արվում։

«Զոշենկոն մի պատմվածք ունի, կոչվում է «Քրեական հետախուզության գործակալը»։ Այդ պատմվածքում մեկից մի բան են գողանում, քրեականի գործակալը գալիս է մի հաղթանդամ շան հետ, ամբողջ գյուղը շարք է կանգնեցնում, շունը հերթով մոտենում է ու հաչում։ Շարքի առաջին մարդն ասում է՝ ես դա չեմ գողացել, բայց 2 կաղամբ եմ գողացել, ասում է՝ սրան սայլի մեջ նստեցրեք, 2-րդին է մոտենում, 2-րդն ասում է՝ ես էլ չեմ գողացել, բայց 2 տախտակ եմ գողացել... Սայլը լցվում է համագյուղացիներով եւ շունը շրջվում է դեպի իրեն , նայում է վրան ու ասում՝ .«հանկարծ այս շան որդին չհաչա, բա ես ինչեր պիտի պատմեմ։ Սա էր հարցի պատասխանը»,-շարունակեց մեր զրուցակիցը։

Բացելով փակագծերը, Գուրգեն Եղիազարյանը նկատում է՝ երկրի վիճակը շատ ծանր է ու ամեն բան երերում է։ «Իր ասած 800 միլիոն դոլարը մենք բյուջեում չտեսանք, իր խոստացած ներդրումները չտեսանք, այսօր բառի բուն եւ լայն իմաստով խայտառակ վիճակ ունենք՝ թե ներքաղաքական , թե արտաքին քաղաքականության մեջ։ Իսկ այս վիճակում «ժողովուրդ ջան»-ին ինչո՞վ են կերակրում՝ ձերբակալություններով։ «Հպարտ քաղաքացու» համար բռնում են Ա-ին, «ժող. ջան»-ի համար բռնում են Բ-ին , Գ-ին, Դ-ին խոստանում են եւ այսպես նաեւ Հոկտեմբերի 27-ը»,-նշում է Գուրեգն Եղիազարյանը։

Նրա խոսքով, աստվածահաճո քայլ չէ Հոկտեմբերի 27-ի արյունն օգտագործել ներքաղաքական ճղճիմ խնդիրները լուծելու համար. «20 տարի է անցել, ի՞նչ հոգեբանական վիճակում է այսօր գտնվում Նաիրի Հունանյանը, իրենից ի՞նչ է ներկայացնում, Նաիրին հիվանդ է, հիվանդ չէ...կցկտուր տեղեկությունները, որն ստանում ենք այդ խոսակցությունից, հասկանալի են դարձնում, որ նա որեւէ բան չի ասել» ։
Գուրգեն Եղիազարյանը նկատի ունի որպես անկախ պատգամավոր հանդես եկող Արման Բաբաջանյանի եւ Նաիրի Հունանյանի զրույցը։ Հիշեցնենք, Բաբաջանյանը հանդիպել է Հունանյանին եւ 2.5 ժամ զրուցել, իսկ այդ հանդիպումից առաջ հայտնի էր դարձել, որ ցմահ դատապարտված Նաիրի Հունանյանը սեպտեմբերի 11-ին դիմել է համապատասխան մարմիններին՝ պայմանական վաղաժամկետ ազատվելու համար։

Անդրադառնալով Նաիրի Հունանյանի այդ զրույցից հետո Արման Բաբաջանյանի հայտարարություններին ու դրանցում արված ակնարկներին` Գուգեն Եղիազարյանն ասաց. «Վազգեն Մանուկյանը 53 տարվա ընկերս է, այդ տարիների ընթացքում նրա հետ շփվելիս, բացի առաքինությունից, որեւէ այլ բան չեմ տեսել։ Այսօր Վազգեն Մանուկյանի մասին խոսելը, նրա անվան հետ ինչ-որ բան կապելը հեռահար նպատակ ունի, այսինքն, ով Նիկոլին դեմ է, կդառնա Զոշենկոյի քրեական հետախուզության հերոսը՝ շանը պահենք վրան, որ հաչա՞»։

Ըստ Եղիազարյանի, որեւէ նոր բան Նաիրի Հունանյանը ասել չի կարող եւ այս գործընթացը, նրա ձեւակերպմամբ, անցնելու է «մանկական փռշտոցի նման»։

Աղբյուր` Փաստինֆո