Փաստ ինֆո

Կալանավորման մեջ գտնվող ԱԺ աշխատակազմի ղեկավարի նախկին տեղակալ Արսեն Բաբայանի տեսակցությունների վրա արգելանք դնելու մասին քննիչի որոշումը կբողոքարկվի։ Այս մասին «Փաստինֆո»-ի հետ զրույցում ասաց Արսեն Բաբայանի պաշտպան Երվանդ Վարոսյանը։ Նրա խոսքով՝ քննիչի որոշումը դեռ չեն ստացել, բայց ստանալուն պես կբողոքարկեն։

«Մեր համոզմամբ՝ ոչ միայն այդ որոշումն է անհիմն, այլ առհասարակ տեսակցությունների սահմանափակումը օրենսդրորեն կարգավորված չէ Հայաստանում»,- ասաց Վարոսյանը։

Հարցին, թե ինչո՞վ կարող է պայմանավորված լինել քննիչի նման որոշումը՝ Վարոսյանը նշեց. «Ռեպրեսիայով։ Տեսակցությունների արգելքը Արսեն Բաբայանի ապօրինի կալանքի տրամաբանական շարունակությունն է։ Պայմանավորված է միայն Հայաստանում տեղի ունեցող ռեպրեսիաներով»։
Պաշտպանը նշեց, որ հանդիպել է Արսեն Բաբայանի հետ։ Հարցին, թե արդյո՞ք նկատել է հոգեբանական ճնշվածություն, Վարոսյանն ասաց, որ բացարձակ որևէ ճնշում չի նկատել Բաբայանի մոտ և վերջինս մարտական է տրամադրված։

Հիշեցնենք, որ հոկտեմբերի 24-ին Երևանի ընդհանուր իրավասության դատարանը ոչ իրավաչափ է համարել Արսեն Բաբայանի ձերբակալությունը, բայց նաեւ բավարարել է քննիչի միջնորդությունը նրա նկատմամբ որպես խափանման միջոց կալանավորումն ընտրելու մասին՝ մերժելով փաստաբանների գրավի միջնորդությունը։ Ավելի վաղ հայտնել ենք, որ հոկտեմբերի 21-ին պաշտոնեական կեղծիք կատարելու կասկածանքով ձերբակալվել էր ԱԺ աշխատակազմի ղեկավարի նախկին տեղակալ Արսեն Բաբայանը։ Նույն օրը փաստաբանները դատարան էին մուտքագրել բողոքը՝ ձերբակալելու որոշման դեմ, սակայն դատարանը ձգձգեց բողոքի քննարկումը։ Հոկտեմբերի 22-ի երեկոյան՝ Արսեն Բաբայանին մեղադրանք է առաջադրվել ՀՀ քրեական օրենսգրքի 38-300-րդ հոդվածի 1-ին մասով և 314-րդ հոդվածի 1-ին մասով նախատեսված հանցավոր արարքների՝ իշխանության յուրացմանը օժանդակելու և պաշտոնեական կեղծիք կատարելու հատկանիշներով։ Իսկ այսօր հայտնի դարձավ, որ քննիչը Արսեն Բաբայանի տեսակցությունների վրա արգելանք է դրել։

Հեղինակ` Իզաբել Սահակյան