Փաստ ինֆո

Վերջին 9 ամիսների ընթացքում ՀՀ-ում գրանցվել է անչափահասների նկատմամբ բռնության 116 դեպք, ընտանիքում՝ 8 դեպք, իսկ սեռական ազատության և սեռական անձեռնմխելիության դեմ ուղղված հանցագործությունների թիվը 45 է: Այս մասին «Փաստինֆո»-ի հետ զրույցում ասաց ՀՀ ոստիկանության ՔՀԳՎ անչափահասների իրավունքների պաշտպանության և ընտանեկան բռնության կանխարգելման վարչության պետ, գնդապետ Նելլի Դուրյանը: 

Համեմատելով 2018թ. նույն ժամանակահատվածում անչափահասների նկատմամբ տեղի ունեցած բռնության դեպքերը՝ տիկին Դուրյանը նշեց, որ գրանցվել է 117 դեպք, այսինքն՝ նվազել է 1 դեպքով և կարելի է ասել, որ պատկերը կայուն է: Ինչը վերաբերում է ընտանիքում անչափահասների նկատմամբ բռնությանը, ապա 2018թ. առաջին 9-ամսյակում գրանցվել է 3 դեպք, այսինքն՝ ընտանիքում անչափահասների նկատմամբ բռնության դեպքերն ավելացել են 5-ով: 2018թ.-ին սեռական ազատության և սեռական անձեռնմխելիության դեմ ուղղված հանցագործությունների թիվը եղել է 43, այսինքն՝ այս տարվա համեմատ 2 դեպքով քիչ:

«Եթե խոսենք երեխայի մասին՝ որպես անձի, ապա մեկ դեպքն էլ սարսափելի է: Եթե այս տվյալները վերցնենք որպես թիվ, ապա 116 և 117»,- ասաց տիկին Դուրյանը:

Անդրադառնալով սեռական անձեռնմխելիությանն ուղղված հանցագործության դեպքերի աճին՝ Նելլի Դուրյանը նշեց, որ երեխաների պաշտպանության և իրազեկման հարցում առաջնային դեր է կատարում ծնողը:

«Առաջին իրազեկողը պետք է լինի ծնողը: Ամեն անգամ անդրադառնում ենք ընտանիքին, որովհետև ծնողների դերն անգնահատելի է երեխայի սեռական դաստիարակության հարցում: Ինչպես ընդունված է եղել մեզ մոտ՝ աղջիկների հետ խոսել է մայրիկը, տղաների հետ՝ հայրիկը: Կարծում եմ, որ դա պետք է լինի նաև այսօր: Առաջինը ծնողի դերն է, հետո՝ կրթությունը»,- ասաց Նելլի Դուրյանը՝ ընդգծելով, որ նախկինում սահմանված է եղել համապատասխան տարիքը՝ դեռահասությունը, սակայն այսօր երեխաները շուտ են զարգանում:

Հարցին, թե սեռական բնույթի հանցագործության անչափահաս զոհերը հիմնականում քանի՞ տարեկան են, տիկին Դուրյանն ասաց, որ նրանց տարիքային շեմը սկսում է 12-13 տարեկանից: Նրա խոսքով՝ կան 15 տարեկան դեռահաս աղջիկներ, որոնք հայտնվում են փողոցում՝ լեզու չգտնելով ծնողների հետ:

«Ասել՝ մարմնավաճառ, այս երեխան մարմնավաճառ չէ, ուղղակի անգիտակցաբար կարող անկանոն սեռական կյանք վարել»,- ասաց Դուրյանը:

Նա նշեց, որ ոստիկանությունն առաջարկել է, որպեսզի այս աղջիկների համար ստեղծվեն հատուկ վերականգնողական ծառայություններ, որտեղ նրանց հետ կաշխատեն հատուկ վերապատրաստված հմտություններ ունեցող մասնագետներ, աղջիկները կստանան պատշաճ ուսում, կզբաղվեն արվեստով և արհեստով, ծրագրում կներգրավվի նաև Հայ առաքելական եկեղեցին: Առաջարկն ընդգրկվել է «Երեխաների իրավունքների պաշտպանության» ռազմավարական ծրագրում։

«Դա հնարավորություն կտա, որ աղջիկները կտրվեն փողոցից: Նրանց թիվը մեծ չէ, բայց մենք իրավունք չունենք կորցնելու թեկուզ 7-8 երեխա: Նման իրավունք մենք չունենք»,- նշեց Դուրյանը:

Ինչը վերաբերում է տղա երեխաների նկատմամբ սեռական բռնության դեպքերին, տիկին Դուրյանը նշեց, որ նման դեպքերի թիվը շատ փոքր է: Համեմատելով նախորդ տարիներին՝ տիկին Դուրյանն ընդգծեց, որ տղա երեխաների նկատմամբ սեռական բռնությունը զգալիորեն նվազել է:

Հարցին, թե անչափահասների նկատմամբ սեռական բռնության և գործողությունների դեպքերը հիմնականում որտե՞ղ է տեղի ունենում՝ տանը, թե դրսում, տիկին Դուրյանն ասաց «Սեռական բռնությունը երեխաների նկատմամբ լինում է դրսում, բայց ծանոթ անձանց կողմից: Կարող է լինել հարևան, մայրիկին մոտ մարդ: Հազվադեպ տանը նույնպես լինում են դեպքեր: Լինում են հայրեր, որոնք խորթ են կամ մոր սիրեկանն են »:

Հեղինակ` Իզաբել Սահակյան