Փաստ ինֆո

«Յուրաքանչյուր իրավական գործընթաց, որ տեղի է ունենում ՀՀ-ում, պետք է լինի բացառապես օրենքի, Սահամանադրության շրջանակներում»,-այս մասին այսօր լրագրողների հետ ճեպազրույցում ասել է ԱԺ «Բարգավաճ Հայաստան» խմբակցությունը քարտուղար Արման Աբովյանը՝ անդրադառնալով ԱԺ աշխատակազմի ղեկավարի նախկին տեղակալ Արսեն Բաբայանի կալանավորմանը։

Հիշեցնենք, որ հոկտեմբերի 21-ին պաշտոնեական կեղծիք կատարելու կասկածանքով ձերբակալվել է ԱԺ աշխատակազմի ղեկավարի նախկին տեղակալ Արսեն Բաբայանը։ Նույն օրը փաստաբանները դատարան են մուտքագրել բողոքը՝ ձերբակալելու որոշման դեմ, սակայն դատարանը ձգձգեց բողոքի քննարկումը։

Հոկտեմբերի 22-ի երեկոյան՝ Արսեն Բաբայանին մեղադրանք առաջադրվեց ՀՀ քրեական օրենսգրքի 38-300-րդ հոդվածի 1-ին մասով և 314-րդ հոդվածի 1-ին մասով նախատեսված հանցավոր արարքների՝ իշխանության յուրացմանը օժանդակելու և պաշտոնեական կեղծիք կատարելու հատկանիշներով։

Ա.Աբովյանը նշել է, որ ԲՀԿ-ն առաջնորդվում է պարզ գաղափարով, ըստ որի գոյություն ունեն իրավական ընթացակարգեր և պետք է հենվել դրանց վրա։

«Քանզի պրոցեսը նոր է սկսել, և այն արդեն իսկ բավականին մեծ քաղաքական արձագանք ունի, ապա իմ հնչեցրած տեսլականն ամենակարևորն ու առանցքայինն է»,-ասաց Աբովյանն ու ընդգծեց՝ կարևոր է շատ զրուշությամբ քաղաքական գնահատական տալ ու սպասել իրավական գործընթացի ընթացքին։

«Գոյություն ունի հստակ, պարզ գաղափար. մենք պետք է հիմնվենք ոչ թե էմոցիոնալ ֆոնի, ասեկոսեների ու տեղեկատվական ճնշումների վրա, այլ բացառապես իրավական հստակ հասկանալի, միգուցե վիճելի, բայց իրավական ընթացքի վրա։ Իհարկե, յուրաքանչյուր ընթացք, որը տեղի է ունենում ՀՀ-ում և ունի կամ կունենա ռեզոնանանս, այն մեր ուշադրության տակ է, սակայն չխաթարելու ու խանգարելու համար, պետք է հիմնվել բացառապես իրավական հենքի վրա»։

ԲՀԿ քարտուղարը շեշտել է, որ տեղեկատվական դաշտը շատ հակասական է, և հիմնվելով կարծիքների վրա եզրկացություն անելն անարդյունավետ է։

Հեղինակ` Սոնա Գեւորգյան