Փաստ ինֆո

Հոկտեմբերի 27-ից հետո ես ուժային կառույցների մեջ լինելու որևէ ցանկություն չեմ ունեցել։ Այս մասին լրագրողների հետ հանդիպման ժամանակ ասաց ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը՝ պատասխանելով հարցին, արդյոք ունի հավակնությություն՝ ղեկավարելու ուժային որևէ կառույց։

«Հոկտեմբերի 27-ից հետո արդեն ուժային կառույցները և այն ժամանակվա իշխանությունները լրիվ այլ խնդիր էին լուծում։ Հոկտեմբերի 27-ի կրակահերթը կոտրեց մեր երկրի քաղաքական հեռանկարը։ Ես եղել եմ ընդդիմության մեջ մինչև որ անցյալ տարի Ձեր երիտասարդ սերունդն իրացրեց այն ցանկությունները, որը մեր սերունդը պարբերաբար փորձել էր անել»,-ասաց Անդրանիկ Քոչարյանը։

Անդրադառնալով դիտարկմանը, թե «Իմ քայլը» խմբակցությունում առկա են դժգոհություններ կապված Ապրիլյան ռազմական հանգամանքներն ուսումնասիրող քննիչ հանձնաժողովի հետ, Անդրանիկ Քոչարյանն արձագանքեց. «Երևի օգտվում եք նախկին իշխանությունների կայքերի տարածած խարդավանքների ձևակերպումներից։ Վերջերս այդպիսի բաներ գրել են մի քանի կայքեր և նույնիսկ մեկ թերթ, որն ինձ համար ծիծաղելի էր, երբ խոսվում էր, որ բարձրաստիճան ինչ-որ զինվորականներ դժգոհություն են հայտնում, ճանապարհներ են հարթում, որպեսզի փաստաբանների միջոցով տեսնեն կգան հանձնաժողով թե ոչ։ Դա հնչեց այն ժամանակ, երբ ես հնչեցրեցի, որ Սերժ Սարգսյանն անխուսափելիորեն հրավիրվելու է քննիչ հանձնաժողով»,-ասաց Անդրանիկ Քոչարյանը՝ ընդգծելով, որ իրենց ֆրակցիան դժգոհություն չէր կարող ունենալ միայն այն պատճառով, որ հանձնաժողովի աշխատանքները հիմնականում փակ են։

Հեղինակ` Հասմիկ Կոշկարյան