Փաստ ինֆո

«Հարգելով եվրոպական քաղաքակրթությունը եւ արժեքները, մենք չպետք է թույլ տանք, որ այդ բացասական երեւույթները ներխուժեն մեր երկիր։ Ես դատապարտում եմ եւ գտնում եմ, որ կառավարությունը խիստ շռայլ է գտնվել նման հանգանակում անելով այդ ուղղությամբ»,- «Փաստինֆո»-ին ասել է ԱԺ ԲՀԿ խմբակցության պատգամավոր Գեւորգ Պետրոսյանը՝ անդրադառնալով սեռափոխության ենթարկված անձի պատմությունը ներկայացնող ֆիլմի նկարահանման համար պետական միջոցներից 20 միլիոն դրամի տրամադրմանը։

Հիշեցնենք, պետությունը 20 միլիոն դրամ կտրամադրի ծանրամարտիկ Մելինե Դալուզյանի՝ Մելի, մասին պատմող «Մել» ֆիլմի նկարահանմանը, որտեղ կներկայացվի սեռափոխության ենթարկված Մելի եւ նրա ընկերուհու պատմությունը, սեռային փոքրամասնությունների իրավունքների պաշտպանությանն ուղղված պայքարը։

Գեւորգ Պետրոսյանի խոսքով, երբ պատգամավորները օրինակ, դատաիրավական բարեփոխումների ծրագիր են ներկայացնում, առաջարկում են ավելացնել դատավորների թիվը, որպեսզի գործերը չկուտակվեն եւ ողջամիտ ժամկետներում քննվեն, պատասխանը մշտապես նույնն է՝ բյուջեում գումար չկա։ Ըստ պատգամավորի, ստացվում է՝ կարեւոր խնդիրների համար միջոցները խնայվում են, բայց նույնասեռականության քարոզի վրա ծախսվում. «Ես դատապարտում եմ դա եւ առիթի դեպքում շատ ավելի խորքային գնահատականներ կհնչեցնեմ։ Ամենացավալին այն է, որ այսօր, պայմանականորեն, եթե ընդունենք, որ հեղափոխություն է եղել, թեեւ ես դրան իշխանափոխություն եմ անվանում, այդ հեղափոխության մեջ համասեռամոլներն իրենց ներդրումն ամենամեծն են համարում , ոչ ավանդական սեռական կողմնորոշման կողմնակիցները գտնում են, որ հեղափոխությունը իրենց ուսերին է տարվել եւ ավարտվել, ինչը այդպես չէ։ Ժողովրդի ավելի ստվար զանգվածի ուսերին է եղել, որը հավատացել է այսօրվա իշխանությանը, մինչդեռ հենց նրանք են ամենաշատը հավակնում օգտվել իշխանափոխության պտուղներից»,-ասաց Գեւորգ Պետրոսյանը՝ հավելելով.«Եթե իշխանությունը, կառավարությունը նման լուրջ գումար է ներդնում, նշանակում է, որ կառավարությունը սատարում է նրանց տեսակետը, ինչը մեզ համար ոչ ավել, ոչ պակաս՝ դժբախտություն է»։

Պատգամավորի խոսքով, մի երկրում, որտեղ բնակչության առնվազն 1/3-ն աղքատության ճիրաններում է, կառավարությունը նման շռայլություն ցուցաբերելու իրավունք, ուղղակի չունի։ Առհասարակ, ըստ Պետրոսյանի, ոչ ավանդական սեռական կողմնորոշման քարոզ Հայաստանում, չպետք է թույլ տալ, իսկ նման պատմությունների մասին նկարահանվող ֆիլմերը ուղիղ քարոզ են։

«Փաստորեն, կառավարությունը, ոչ միայն չի ազդում, այլեւ նպաստում է այդ կողմնորոշման տարածմանը։ ԲՀԿ խմբակցությունը՝ մեր կուսակցության ղեկավարի գլխավորությամբ, կատեգորիկ դեմ է նման երեւույթներին, ով ինչպես ուզում է՝թող մեկնաբանի։ Մեզ համար եվրոպական արժեքները ընդունելի եւ կիրառելի են այնքանով, որքանով չեն խաթարում մեր ազգային ինքնությունը, մեր ազգային անվտանգությունը եւ ընդհանրապես, մեր պետության ինքնիշխանությունը»։

Գեւորգ Պետրոսյանն ասում է՝ այս քարոզը ուղղակիորեն կապված է նաեւ Ստամբուլյան կոնվենցիայի հնարավոր վավերացման հետ։ Ըստ նրա, այդ կապը չտեսնելու համար կույր պետք է լինել. «Տարբեր կողմերից են գրոհում, որպեսզի հասնեն հաջողության, բայց ես լիահույս եմ, որ կառավարությունը, ի վերջո, կհասկանա, որ պատմության մեջ իր անունը կարող է դաջվել որպես այնպիսի կառավարություն , որի օրոք այդ երեւույթները կարողացան ներթափանցել Հայաստան։ Հուսով եմ, որ գոնե վերջին պահին կառավարությունը ողջամիտ կլինի ՝ կանխելու դա, որովհետեւ, բարեբախտաբար, ակնհայտ է, որ մեր ժողովրդի բացարձակ մեծամասնությունը դեմ է այդ այլանդակություններին եւ գոնե հասարակական ճնշումը կլինի այնքան եւ այնպես, իհարկե օրենքի շրջանակներում, որ կառավարությունը կարողանա հետ կանգնել երեւույթները տեղայնացնելու իր մտադրություններից»։

Աղբյուր` Փաստինֆո