Փաստ ինֆո

Դուք չգիտե՞ք, որ ուժային կառույցների ղեկավարները քաղաքական հայտարարություն անելու իրավունք չունեն և քաղաքականության մեջ իրենք անելիք չունեն։ Այս մասին լրագրողների հետ ճեպազրույցում ասաց ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։ Անդրադառնալով փոխոստիկանապետ Հովհաննես Քոչարյանի պաշտոնանակության վերաբերյալ վարչապետի խոսնակի մեկնաբանությանը՝ Անրդանիկ Քոչարյանն ասաց. 

«Եթե այդպես է գնահատվել իր հայտարարությունը և որոշումը կայացվել է այդ կոնտեքստում, ամեն դեպքում որոշումը կայացված է։ Եթե քաղաքական ենթատեքստ են տեսել դրա մեջ, բնականաբար որոշումը պետք է չհապաղեր»,-ասաց Անդրանիկ Քոչարյանը՝ ընդգծելով, որ ափսոսում է, որովհետև Հովհաննես Քոչարյանն այս ընթացքում իրենց հանձնաժողովի հետ արդյունավետ է աշխատել, բարձր մակարդակով. «Ես միշտ ասել եմ՝ ոստիկանությունում ամենաարժեքավոր ոստիկանները նման ինտելեկտի կրող մարդիկ են և ես որևէ բան չեմ կարող ասել։ Ափսոսում եմ, որովհետև դա ոստիկանության համար կադրային կորուստ է, բայց նման բարձր դիրք զբաղեցնող ոստիկանը նաև պետք է իմանա, որ չպետք է ընկնեն քաղաքական շահարկման մեջ»,-ասաց Անդրանիկ Քոչարյանը։

Հիշեցնենք, որ հոկտեմբերի 22-ին Հովհաննես Քոչարյանը հայտարարել էր, որ կողմ չէ ոստիկանապետի պաշտոնը քաղաքական դարձնելուն:

«Ոստիկանության կարծիքը չի համընկնում նախագծի հեղինակների կարծիքի հետ: Մենք մեր կարծիքն ունենք Ոստիկանության կազմակերպման և գործունեության կարգի վերաբերյալ ու ռազմավարության ծրագրի հրապարակումից հետո բոլորը կկարողանան ծանոթանալ դրան: Դրանում մանրամասն հիմնավորել ենք` ինչպես ենք տեսնում Ոստիկանության կառուցվածքը, ինչպես ենք պատկերացնում նրա նկատմամբ քաղաքական վերահսկողության մեխանիզմները»,- նշել էր Քոչարյանը:

Նրա խոսքով՝ նախագիծը պայմանավորված է քաղաքական նպատակահարմարությամբ, որն իրավիճակային լուծումներ է առաջարկում:
Այս հայտարարությունից հետո Հ.Քոչարյանն ազատվել է պաշտոնից։

Հեղինակ` Հասմիկ Կոշկարյան