Փաստ ինֆո

ԱԳ նախարար Զոհրաբ Մնացականյանի՝ BBC լրատվական ծառայության Hard Talk հաղորդմանը տված հարցազրույցում ուշագրավ դրվագներ կան Հայաստանի ներքաղաքական օրակարգին առնչվող հարցուպատասխանում։ Մասնավորապես, հարցազրուցավար Սթիվըն Սակուրը նախ նկատում է, թե արդարադատության նախարարը՝ Բադասյանը, օրեր առաջ հայտարարել է, որ հակակոռուպցիոն հանցագործությունների բացահայտման և քննության իրավասության միասնական մարմինը, այսպես կոչված, Հակակոռուպցիոն կոմիտեն կստեղծվի միայն 2021թ ու հարցնում, թե հանձնաժողով ստեղծելու համար արդյո՞ք երկու տարի է պահանջվում։

ՀՀ ԱԳ նախարար Զոհրաբ Մնացականյանը պատասխանում է. « Ոչ, ոչ, սա բավական համապարփակ գործընթաց է. պետք է աշխատել կոռուպցիայի դեմ պայքարի ինստիտուցիոնալ կարողությունների ստեղծման ուղղությամբ: Եվ սա շատ ավելի բարդ է: Իրականում, մենք այդ ուղղությամբ աշխատում ենք ոչ միայն երկրի ներսում, այլև մեր միջազգային գործընկերների հետ, մասնավորապես տարածաշրջանային գործընկերների, ինչպիսիք են Եվրամիությունը, Եվրոպայի խորհուրդը և այլ կարևոր դերակատարներ»:

Ապա Սթիվըն Սակուրը հեգնական նկատում է, որ խոսքն ապագայի մասին չէ եւ կա որոշակի մեծամտություն կառավարությունում, քանի որ ոչ վաղ անցյալում վարչապետ Փաշինյանը եվրոպացի պատգամավորներին ասել է, մեջբերում, «մեզ հաջողվել է արմատախիլ անել համակարգային կոռուպցիան»: «Դա ակնհայտորեն ճիշտ չէ»,-պնդում է լրագրողը:

Ի պատասխան Զոհրաբ Մնացականյանը հարցնում է, թե ինչու եւ լրագրողը նկատում է, թե դա ասելուց ընդամենը մի քանի շաբաթ անց, հակակոռուպցիոն գործակալության պետին առաջադրված լուրջ մեղադրանքներ կային, մարդ ում նշանակել է հենց ինքը՝ վարչապետը:

Այնուհետեւ Սթիվըն Սակուրը հիշում է ՊՎԾ նախկին պետ Դավիթ Սանասարյանի դեմ հարուցված քրեական գործը, թե Սանասարյանին, ով վարչապետի մտերիմներից է և նշանակվել էր Պետական վերասկողական ծառայության՝ ներկայիս հակակոռուպցիոն ծառայության պետ, այժմ առաջադրվել են մեղադրանքներ: Երբ ժողովուրդն ականատես է լինում նման զարգացման, ինչպես կարող է վստահություն ունենալ: Զոհրաբ Մնացականյանը պատասխանում է.« Բայց չէ՞ որ համակարգն արձագանքեց, այսպես չէ՞: Համակարգն արձագանքել է»:

Լրագրողը պնդում է, որ նկատի ունի այն, որ վարչապետը վստահեցրել էր Եվրոպային, որ ինքն արմատախիլ էր արել համակարգային կոռուպցիան նախքան...» ։ Զոհրաբ Մնացականյանն առաջարկում է դա այդքան պարզունակ չդարձնել եւ խոսում է ինստիտուցիոնալ կարողություների անհրաժեշտության մասին։

Աղբյուր` Փաստինֆո