Փաստ ինֆո

Դատարանն էլ փաստացի արձանագրեց, որ Արսեն Բաբայանի ազատազրկումն ապօրինի է։ Այս մասին «Փաստինֆո»-ի հետ զրույցում ասաց սահմանադրական իրավունքի մասնագետ Գոհար Մելոյանը՝ անդրադառնալով դատարանի որոշմանը, որով ԱԺ աշխատակազմի ղեկավարի նախկին տեղակալ Արսեն Բաբայանի ձերբակալությունը համարվեց ոչ իրավաչափ, բայց նաեւ բավարարվեց կալանավորելու մասին քննիչի միջնորդությունը։ 

Գոհար Մելոյանը նշեց, որ դատարանն իրավունք ուներ մեկ նիստի ժամանակ քննարկել և՛ ձերբակալելու որոշման դեմ պաշտպանների բողոքը, և՛ վարույթն իրականացնող մարմնի կողմից ներկայացված կալանավորման միջնորդությունը, սակայն դա չի կարող լինել ազատազրկման պահից մինչև 72 ժամը։
Գոհար Մելոյանն ընդգծեց, որ իրավապահ մարմինները ևս արձանագրել են, որ ձերբակալման որոշումը հիմնավոր չէ։

«Արդյունքում՝ կալանավորման միջնորդություն ներկայացնելիս մեղադրանք փոխեցին և ավելացրեցին ևս մեկ հոդված»,- ասաց Գոհար Մելոյանը՝ նշելով, որ սա փաստում է այն մասին, որ իրավապահ մարմինները ևս գիտակցում են իրավիճակի լրջությունը։

«Արսեն Բաբայանը շարունակում է մնալ ապօրինի ազատազրկված։ Ինչքանով ՔՕ 314-րդ՝ պաշտոնեական կեղծիքի հոդվածն էր ձերբակալման համար անօրինաչափ, այդքան էլ՝ ՔՕ 300-րդ՝ պաշտոնեական կեղծիքի հիմքով հարուցված քրեական գործն ընդհանրապես որևէ հակափաստարկի չի դիմանում։ Անհիմն, զուտ քաղաքական պատվերի շրջանակներում հարուցված քրեական գործ է »,- նշեց Մելոյանը։

Նրա խոսքով՝ անգամ մեղադրանքի փոփոխման դեպքում կալանավորման հիմքերը բացակայում են։

Ինչը վերաբերում է Արսեն Բաբայանի իրավունքների խախտմանը՝ Գոհար Մելոյանը նշեց, որ կալանավորման որոշումը, հավանաբար, կբողոքարկվի։

«Փոխհատուցման համար դատարանն է որոշում կայացնելու, բայց վստահ եմ, որ, եթե ներպետական ատյանների միջոցով Արսեն Բաբայանը հնարավորություն չստանա բողոքարկել դատարանի որոշումները, անպայման ՄԻԵԴ-ը կտա իր գնահատականը՚։ Դա շատ կոպիտ է լինելու, որովհետև արդար դատավարության սկզբունքի նման ակնհայտ խախտման կարծես թե ականատես չենք եղել։ Լինում ենք ՝ ականատես, որ դատական իշխանության կողմից անհամաչափ պատժատեսակներ են կիրառում, բայց սա այդ զարգացումների էպոպեան էր »,- նշեց Մելոյանը։

Հեղինակ` Իզաբել Սահակյան