Փաստ ինֆո

Հայաստանում իշխանափոխությունից հետո ստվերի ծավալները չեն նվազել։ «Փաստինֆո» - ի հետ զրույցում ասաց ԱԺ ֆինանսավարկային եւ բյուջետային հարցերի մշտական հանձնաժողովի նախկին նախագահ Գագիկ Մինասյանը՝

«Գիտեք՝ կոռուպցիան եւ ստվերը զուգահեռ քայլող երեւույթներ են»,-նշեց Գագիկ Մինասյանն ու հիշեց, որ երբ գործող վարչապետ Նիկոլ Փաշինյանն ընդդիմադիր պատգամավոր էր, տարբեր կառույցներից սնվող այլ ընդդիմադիրների հետ միասին հայտարարում էր, որ Հայաստանում ստվերը 40 տոկոս է, մինչդեռ այժմ, երբ նա իշխանության է , ստվերի ծավալները ընդամենը 0.8 տոկոսով են կրճատվել։

«Արդեն շուրջ երկու տարի է՝ իշխանությունը Նիկոլ Փաշինյանի ղեկավարությամբ է աշխատում, բայց այս 2 տարվա ընթացքում 40 տոկոսանոց ստվերի պարագայում ստվերը կրճատվել է 0.8 տոկոսի չափով, որովհետեւ հարկեր-ՀՆԱ ցուցանիշը, որը բնութագրում է դա, ընդամենը 0.8 տոկոսով է բարձրացել եւ այստեղ առաջանում է չափազանց կարեւորագույն մի հարցադրում՝ երբ քաղաքացիները շփվում են տարբեր մարմինների հետ եւ տեսնում, որ իսկապես այդ ստվերը նվազել է, ո՞րն է պատճառը, որ սա իր դրսեւորումը չունի հարկեր-ՀՆԱ ցուցանիշի մեջ»,-շեշտում է տնտեսագետը։

Պատասխանը, ըստ Մինասյանի շատ կարեւոր է եւ բնութագրական ՝պոպուլիստական իշխանության համար. «Այդպես էր նաեւ Վրաստանում եւ Ուկրաինայում ՝ համապատասխան իշխանափոխություններից հետո։ Ստվերը հասարակական ցածր շերտերից տեղափոխվել է ավելի բարձր մակարդակ։ Սա այսօրվա իշխանության ամենամեծ բնորոշումն է . ըստ էության, ստվերային գործարքները չեն երեւում սովորական, շարքային քաղաքացիների համար , սակայն նրանք պահպանվում եւ տեղափոխվում են ավելի բարձր էշելոններ»։

Գագիկ Մինասյանի խոսքով, հակառակ պարագայում հարկեր-ՀՆԱ հարաբերակցության մեջ աճն այսքան փոքր չէր լինի. «Հետեւաբար, այդ գումարները գնում են տարբեր հիմնադրամներ, տարբեր տեղեր՝ գուցե նաեւ արտասահման, տարբեր մարդկանց կողմից տարբեր հողակտորներ կամ դղյակներ գնելու համար, բայց մի բան ակնհայտ է՝ հարկեր-ՀՆԱ հարաբերակցությունը չափազանց ցածր թվերով է գնում»։

Մինասյանի խոսքով, իրենց իշխանությունը ավելի բարձր ցուցանիշով էր կրճատում ստվերը։ Հարցին, արդյո՞ք սա խոսում է այն մասին, որ իր կողմից մատնանշված բարձր էշելոններում կոռուպցիոն ռիսկեր կան, Մինասյանը պատասխանեց.«Միանշանակ։ Եթե հասարակական լայն շերտերի շրջանում ստվերը նվազել , բայց չի արտահայտվում հարկեր-ՀՆԱ ցուցանիշում, հետեւաբար ուրիշ ոլորտներում է կենտրոնացված, որը հեռու է շարքային քաղաքացիների աչքից։ Նույնը նաեւ Սահակաշվիլու Վրաստանում էր, երբ ամբողջ հասարակությանը թվում, որ ստվերը ցածր է, բայց պարզվեց, որ պետական չինովնիկները մինչեւ ականջները թաղված են ստվերի մեջ»։

Աղբյուր` Փաստինֆո