Փաստ ինֆո

Երեւանի ընդհանուր իրավասության դատարանը քիչ առաջ հավաստեց, որ ԱԺ աշխատակազմի ղեկավարի նախկին տեղակալ Արսեն Բաբայանի ձերբակալությունը եղել է ոչ իրավաչափ՝ բավարարելով ձերբակալության որոշման դեմ փաստաբանների բողոքը։

Միաժամանակ դատարանը բավարարել է քննիչի միջնորդությունը՝ Արսեն Բաբայանի նկատմամբ որպես խափանման միջոց կալանավորումն ընտրելու մասին։

Հիշեցնենք, որ Արսեն Բաբայանը ձերբակալվել էր հոկտեմբերի 21-ին՝ պաշտոնեական կեղծիք կատարելու կասկածանքով։ Հասարակական-քաղաքական շրջանակներն անմիջապես հայտարարեցին, որ ձերբակալությունը եղել է ապօրինի։ «Հայաստանի Հանրապետությունում որևէ անձ չի կարող ազատությունից զրկվել, այդ թվում՝ ձերբակալվել կամ կալանավորել, ՀՀ քրեական օրենսգրքի 314-րդ հոդվածի 1-ին մասով նախատեսված այն արարքների համար, որոնք կատարվել են մինչև 2018 թվականի հոկտեմբերի 21-ը համաձայն՝ «Էրեբունի-երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» օրենքի»,- հայտարարել էր սահմանադրագետ Գոհար Մելոյանը։
Նույն օրը փաստաբանները բողոք էին ներկայացրել դատարան՝ վիճարկելով ձերբակալելու որոշումը։Սակայն դատարանը դրա քննությունը ձգձգեց՝ ժամանակ տալով նախաքննական մարմնին հիմքեր ներկայացնել կալանավորման համար։ Արդյունքում Արսեն Բաբայանին մեղադրանք առաջադրվեց ոչ միայն կեղծիք կատարելու, այլ նաեւ ՍԴ լիազորություններին տիրանալուն օժանդակելու համար եւ միջնորդություն ներկայացվեց դատարան՝ որպես խափանման միջոց կալանավորումն ընտրելու համար։

Դատարանն այսօր, փաստորեն, բավարարել է թե փաստաբանների բողոքը՝ ձերբակալությունը համարելով ոչ իրավաչափ, թե քննիչի միջնորդությունը՝ կալանավորելով Արսեն Բաբայանին։

Այդպիսով՝ ցույց տալով, որ փաստաբանների ենթադրությունները ճիշտ էին՝ դատարանը գործել է նախաքննական մարմնի հետ համաձայնեցված։

Աղբյուր` Փաստինֆո