Փաստ ինֆո

Կառավարության նիստն այսօր մեկնարկել է Համաշխարհային բանկի հրապարակած «Գործարարություն Doing Business 2020» թվականի զեկույցում Հայաստանի արձանագրած հետընթացի պատճառների վերաբերյալ Էկոնոմիկայի նախարար Տիգրան Խաչատրյանի ներկայացրած պարզաբանումներով։

Նշելով, որ զեկույցը յուրաքանաչյուր երկրի համար գործարարությամբ զբաղվելու տասը ցուցիչ է օգտագործում՝ սկսած բիզնեսի սկսման պահից մինչեւ դադարը, նախարարը հայտարարել է, թե Հայաստանը ոչ թե ռեյտինգում այլ՝ զեկույցի դիրքում ունի հետընթաց։

«Հայաստանն այս տարվա գնահատման արդյունքում ունի 74.5 միավոր, որը 2019 թվականի համեմատ նույն մեթոդաբանությամբ տրված գնահատականի համեմատ առաջընթաց է արձանագրել 1.3 միավորով։ Այսինքն՝ մենք նախորդ տարվա մեր վիճակի համեմատ ունենք առաջընթաց։ Եվ դա մեր կողմից մի շարք ոլորտներում իրականացված բարեփոխումների արդյունք է»,-ասել է Տիգրան Խաչատրյանը։

Ըստ նրա, հատկապես առաջընթաց բարեփոխումներ ենք արձանագրել «հարկերի վճարում» ուղղությամբ, ինչը պայմանավորված էր այն հանգամանքով, որ ԱԱՀ վերադարձ է նախատեսվում։ Նաեւ քաղաքաշինական թույլտվությունների առնչությամբ է , ըստ նախարարի, դրական առաջընթաց գրանցվել։

Ինչ վերաբերում է զեկույցում Հայաստանի զբաղեցրած դիրքի հետընթացին, ըստ նրա, կա նաեւ այլ դասակարգում, ըստ որի Հայաստանը 41-րդն էր, ինչը նշանակում է, որ միայն 40 երկրներ կան , որոնք ավելի բարելավված են առաջատարի նկատմամբ։ «Այս տարի 47-րդն ենք, ինչը նշանակում է, որ չնայած ինքներս մեր գնահատման մեջ բարելավում ենք գրանցել, բայց գնահատման ամբողջ պատկերի մեջ 46 երկիր կա , որոնք ավելի մոտ են 1-ին հորիզոնականը զբաղեցնող երկրին», -ասել է նա՝ հավելելով, որ սա պայմանավորված է այն հանգամանքով, որ ՀԲ-ն առաջին անգամ փոխել է իր մեթոդաբանությունը փոքր բաժնետերերի շահերի պաշտպանության ցուցիչը հաշվարկելու առումով, որը ունի 6 առանձին ենթացուցիչներ։

«Այսինքն՝ այս ցուցիչն առանձին վերցված ունի 6 ենթացուցիչներ, որոնք նախորդ տարվա գնահատման արդյունքում որակվում էին, թե մեր իրավական կարգավորումները որքանով են պաշտպանում փոքր բաժնետերերի շահերը։ Եվ մենք այդտեղ էական ռեֆորմ էինք արել, ԱԺ էինք տարել Բաժնետիրական ընկերությունների մասին օրենքի նախագիծ, որը կարգավորումների տեսանկյունից ապահովում էր էապես ավելի պաշտպանվածություն, քան անցյալում էր»,- ասել է նախարարը և հավելել, որ այս տարի ՀԲ-ն իր գնահատման մեթոդաբանության մեջ ոչ միայն իրավական կարգավորումների առկայությունն է հաշվի առնում, այլ նաև այն, թե դրանց արդյունքում արժեթղթերի բորսայում քանի ցուցակված մասնավոր կազմակերպություններ կան, որոնք բաժնետոմսեր են շրջանառում։ Այսինքն՝ բորսայի կայացվածությունը դարձել է որպես գնահատման հիմք։

Նիկոլ Փաշինյանն արձագանքել է, թե սկզբունքորեն դա վատ նորություն չէ, որովհետև այն կառավարության օրակարգի կարևորագույն հարցերից է: «Ուզում եմ ասել, իմիջիայլոց, անցած տարվանից այդ առումով որոշակի, շատ աննախադեպ իրադարձություններ են եղել Հայաստանում. մի քանի ընկերություններ որոշակի բաց բաժանորդագրություն են արել, երկու ընկերություն պարտատոմսեր են թողարկել, որը, ըստ էության, նախաքայլ է արժեթղթերի բորսայում հայտնվելու: 60 մլն դոլարին համարժեք գումար են ներգրավել: Եվ եթե դա է պատճառը, մենք, ըստ էության, գտնվում ենք նախապատրաստական մի շրջանում: Սա նաև մեզ համար ահազանգ պետք է լինի, որ իսկապես ավելի ակտիվացնենք արժեթղթերի բորսայի հետ կապված մեր աշխատանքները: Ես գիտեմ, որ բորսայի սեփականատերերը, նաև ներգրավված ընկերությունները մտադրություններ ունեն ակտիվացնել, որովհետև նոր տնտեսական պայմաններում դրա համար բավական բարենպաստ իրավիճակ է ստեղծվել, և այս ահազանգը մեզ պետք է խթանի, որպեսզի մենք ավելի ինտենսիվ աշխատենք այդ ուղղությամբ»,- հայտարարել է Նիկոլ Փաշինյանը:
«Փաստինֆո»-ն ավելի վաղ տեղեկացրել էր, որ Համաշխարհային բանկը հրապարակել է «Գործարարություն Doing Business 2020» զեկույցը, որտեղ Հայաստանը բավականաչափ հետ է գնացել։ Նախորդ տարվա 41-ից այն հայտնվել է 47-րդ հորիզոնականում։

Այսինքն` գործարարության բարելավման ինդեքսով Հայաստանը հետ է ընկել ևս մի քանի երկրներից։ Ու ոչ մի նշանակություն չունի, որ փոխվել են գնահատման մեթոդները կամ նոր տարրեր են ավելացվել։

Աղբյուր` Փաստինֆո