Փաստ ինֆո

Արսեն Բաբայանին անազատության մեջ պահելը միտված է ապահովել Հրայր Թովմասյանի նկատմամբ ճնշումը։ Այսօր նման հայտարարությամբ է հանդես եկել փաստաբան Լուսինե Սահակյանը՝ մեկնաբանելով Երեւանի ընդհանուր իրավասության դատարանի որոշումները։

Ինչպես արդեն «Փաստինֆո»-ն տեղեկացրել է՝ դատարանը ոչ իրավաչափ է համարել Արսեն Բաբայանի ձերբակալությունը, բայց նաեւ բավարարել քննիչի միջնորդությունը նրա նկատմամբ որպես խափանման միջոց կալանավորումն ընտրելու մասին՝ մերժելով փաստաբանների գրավի միջնորդությունը։ Դատական նիստին Արսեն Բաբայանը մասնակցել է։

«Նաև գրավի միջնորդություն էինք ներկայացնել՝ նկատի ունենալով այն հանգամանքը, որ օրենսդրությամբ այնպիսի կարգավորում կա, որ դա այլընտրանքային խափանման միջոց է։ Չնայած, որ մենք գտնում էինք, որ կալանքը՝ որպես խափանման միջոց չի կարող ընդհանրապես կիրառվել, քանի որ մեղադրանքն ընդհանրապես անհիմն էր և դատարանը պետք է ֆիքսեր, որ հիմնավոր կասկածն առկա չէ։ Հիմքերից խոսելն ավելորդ է »,- նշեց Լուսինե Սահակյանը։

Նրա խոսքով՝ սա քաղաքական դատավարություն է, և դատավորը չէր կարող անկախ լինել։

«Ակնհայտ ապօրինի են այն պրոցեսները, որոնք կատարվում են։ Հերթական անձը պետք է գտնվեր անազատության մեջ, որպեսզի հերթական ճնշումը լիներ Հրայր Թովմասյանի նկատմամբ։ Դատարանը դա ապահովեց »,- ընդգծեց Սահակյանը։

Նրա խոսքով՝ դեռ չի ծանոթացել որոշման հիմքերին։

«Դատարանն ընդհանրապես այդ ձերբակալման ոչ իրավաչափության հարցը պետք է քննարկեր 24 ժամվա ընթացքում, ինչը չարեց։ Այնքան ժամանակ Արսեն Բաբայանին պահեցին անազատության մեջ, մինչև դատարանը կալանքի որոշում կայացրեց և կալանավորեց։ Նույնիսկ այդ մի քանի ժամը իրենք վախենում էին, որ Արսեն Բաբայանը կհայտնվի ազատության մեջ»,- շեշտեց պաշտպանը։

Պաշտպանը նշեց, որ որոշումը կբողոքարկվի։

Ավելի վաղ հայտնել ենք, որ հոկտեմբերի 21-ին պաշտոնեական կեղծիք կատարելու կասկածանքով ձերբակալվել է ԱԺ աշխատակազմի ղեկավարի նախկին տեղակալ Արսեն Բաբայանը։ Նույն օրը փաստաբանները դատարան են մուտքագրել բողոքը՝ ձերբակալելու որոշման դեմ, սակայն դատարանը ձգձգեց բողոքի քննարկումը։ Հոկտեմբերի 22-ի երեկոյան՝ Արսեն Բաբայանին մեղադրանք է առաջադրվել ՀՀ քրեական օրենսգրքի 38-300-րդ հոդվածի 1-ին մասով և 314-րդ հոդվածի 1-ին մասով նախատեսված հանցավոր արարքների՝ իշխանության յուրացմանը օժանդակելու և պաշտոնեական կեղծիք կատարելու հատկանիշներով։

ՀՀ հատուկ քննչական ծառայությունում հարուցված նույն քրեական գործի շրջանակներում որպես կասկածյալ է ներգրավվել ԱԺ նախկին նախագահ Արա Բաբլոյանը՝ իշխանությունը յուրացնելու կասկածանքով։

Հեղինակ` Իզաբել Սահակյան