Փաստ ինֆո

Կա՞ մտավախություն, որ հենց այս պահին ունենք արդիական վտանգ, որ վաղը կամ մյուս օրը կարող է երկրում հայտարարվել ռազմական դրություն, եղե՞լ է նման մտավախություն։ Այս մասին խորհրդարանում «Ռազմական դրության իրավական ռեժիմի մասին ՀՀ օրենքում» լրացումներ կատարելու մասին օրենքի նախագծի քննարկման ժամանակ այս հարցը բարձրաձայնեց «Բարգավաճ Հայաստան» խմբակցության պատգամավոր Տիգրան Ուրիխանյանը։

Նշենք, որ խորհրդարանն այս պահին քննարկում է նախագիծ, որի ընդունումը Առողջապահության փոխնախարար Լևոն Հակոբյանի պնդմամբ բխում է ռազմական դրության պայմաններում առողջապահության բնագավառի միասնական կառավարման համակարգի ստեղծման և առաջացող խնդիրների արդյունավետ լուծման անհրաժեշտությունից։ ԱՆ փոխնախարարը նկատեց, որ գործող մասնավոր հիվանդանոցային-բժշկական օգնություն և սպասարկում իրականացնող կազմակերպությունների գործունեությունը զգալի դերակատարում կունենա ռազմական դրության պայմաններում. «Նախագծի ընդունմամբ նախատեսվում է ռազմական դրության պայմաններում բժշկական օգնություն և սպասարկում իրականացնող կազմակերպությունների անկախ սեփականության ձևից, կառավարման լիազորությունները վերապահել ՀՀ առողջապական բնագավառի պետական լիազոր մարմնին, իսկ կառավարման լիազորությունները կսահմանվեն կառավարությա որոշմամբ»,-ասաց փոխնախարարը։

ԱԺ պատգամավոր Տիգրան Ուրիխանյանն էլ գործադիրի ներկայացուցչից հետաքրքրվեց՝ որն է այս հարցի հրատապությունը, արդյոք կա վտանգ, որի վերաբերյալ գործադիրում քննարկումներ են եղել։ Հարցին ի պատասխան առողջապահության փոխնախարարն արձագանքեց. «Որպես այդպիսին նման քննարկում չի եղել պատերազմի վտանգի առկայության վերաբերյալ։ Դեղ արտադրողների և ներմուծողների մասով կար օրենքում բաց և սույն օրենքի համապատասխան գլխում կատարվել է լրացում, որպեսզի առողջապահության բնագավառին նույնպես տրվի լիազորվող նորմ»։

Հեղինակ` Հասմիկ Կոշկարյան