Փաստ ինֆո

Խորհրդարանն այսօր երկրորդ ընթերցմամբ և ամբողջությամբ ընդունեց «Լուսավոր Հայաստան» խմբակցության ներկայացրած «ՀՀ քրեական օրենսգրքում լրացում կատարելու մասին» օրենքի նախագիծը, «Քրեակատարողական ծառայության մասին ՀՀ օրենքում» փոփոխություններ կատարելու մասին և կից ներկայացված օրենքի նախագծերի փաթեթը, ԱԺ պատգամավոր Գևորգ Պապոյանի ներկայացրած «ՀՀ աշխատանքային օրենսգրքում» լրացում կատարելու մասին օրենքի նախագիծը, պատգամավորներ Սերգեյ Բագրատյանի և Հովհաննես Հովհաննիսյանի ներկայացրած «Առևտրի և ծառայությունների մասին օրենքում» լրացում կատարելու մասին օրենքի նախագիծը, «ՀՀ տոների և հիշատակի օրերի մասին » ՀՀ օրենքում լրացում կատարելու մասին օրենքի նախագիծը։

Խորհրդարանն առաջին ընթերցմամբ կողմ քվեարկեց նաև կառավարության ներկայացրած «Ռազմական դրության իրավական ռեժիմի մասին» ՀՀ օրենքում լրացումներ կատարելու մասին օրենքի նախագծին, ինչպես նաև ԱԺ պատգամավոր Վարազդատ Կարապետյանի կողմից ներկայացրած «Սևանա լճի էկոհամակարգի վերականգնման, պահպանման, վերարտադրման և օգտագործման միջոցների տարեկան և համալիր ծրագրեր հաստատելու մասին» ՀՀ օրենքում լրացում կատարելու մասին նախագծին։

Այս նախագծի քվեարկության ժամանակ «Իմ քայլը» խմբակցության ղեկավար Լիլիթ Մակունցը հայտնեց, որ խմբակցությունը քվեարկելու է ազատ, իսկ «Լուսավոր Հայաստան» խմբակցության ղեկավար Էդմոն Մարուքյանն ասաց. «Քանի որ քննարկման ժամանակ ներկայացրել ենք մեր մտահոգությունները առ այն, որ հնարավոր է նախագիծը զուտ կրի սիմվոլիկ բնույթ, հիմա ձեռնպահ կքվեարկենք, հետո եթե մեր մտահոգությունները կփարատվեն, կքննարկենք կողմ քվեարկելու հարցը»,-ասաց Էդմոն Մարուքյանը։

Հեղինակ` Հասմիկ Կոշկարյան