Փաստ ինֆո

ՀՀ վերաքննիչ քրեական դատարանը՝ դատավոր Անդրանիկ Մնացականյանի նախագահությամբ, մերժեց Ռոբերտ Քոչարյանի աջակիցներից Նարեկ Մութաֆյանին կալանավորելու դատարանի որոշման դեմ պաշտպանի ներկայացրած բողոքը։ «Փաստինֆո»-ի հաղորդմամբ՝ այս մասին լրագրողների հետ զրույցում ասաց փաստաբան Վահե Եփրիկյանը։

«Այս պահին որոշման բովանդակությանը ծանոթ չենք։ Երբ ծանոթանանք, ավելի մանրամասն կանդրադառնանք դրա մեկնաբանմանը։ Այս պահին կարող եմ փաստել մեկ բան՝ տոտալ իրավախայտառակությունն ուղղակի շարունակվում է և նման բարդակի վերածել իրավական, դատական համակարգն ուղղակի սարսափելի է»,-ասաց Վահե Եփրիկյանը՝ ընդգծելով, որ նման դատարկ միջնորդությունը համարվում է հիմնավոր և պատճառաբանված։

Վահե Եփրիկյանը Նարեկ Մութաֆյանի կալանքի տակ գտնվելը որակեց որպես ապօրինություն։

Ինչպես արդեն տեղեկացրել ենք, սեպտեմբերի 27-ի ուշ երեկոյան դատավոր Աննա Դանիբեկյանին, ում վարույթում է գտնվում Ռոբերտ Քոչարյանի եւ մյուսների վերաբերյալ քրեական գործը, մոտեցել են երկու երիտասարդ՝ Սարգիս Օհանջանյանը և Նարեկ Մութաֆյանը, ու ֆեյսբուքում ուղիղ եթերով հեռարձակում միացնելով, հետաքրքրվել, թե արդյոք նա կա՞ «վնգստացող դատավորների ցանկում»:

Դեպքին անմիջապես անձագանքել էր Բարձրագույն դատական խորհուրդը` նշելով, որ դատավորին տրվել է թիկնապահ, իսկ ԲԴԽ նախագահը մեկնել էր դեպքի վայր։ Հավելենք, որ Աննա Դանիբեկյանը կատարվածի վերաբերյալ հաղորդում էր ներկայացրել Ոստիկանությանը։

Հետագայում դեպքի առթիվ հարուցվել էր քրեական գործ 343-րդ հոդվածի 3-րդ մասով,սակայն մեղադրանքն առաջադրվել էր 332-րդ հոդվածի 1-ին մասով՝ արդարադատությանը խոչընդոտելու համար։

Նրանց նկատմամբ որպես խափանման միջոց է ընտրվել կալանավորումը, ինչի վերաբերյալ փաստաբանը ներկայացրել է վերաքննիչ բողոք։ Ներկայումս քննարկվում է Մութաֆյանի խափանման միջոցի հարցը։

Վահե Եփրիկյանը նշեց, որ պատրաստվում են բողոքարկել, ինչպես ննաև առանձին գրավի միջնորդություն ներկայացնել։

Հեղինակ` Հասմիկ Կոշկարյան