Փաստ ինֆո

Գյուղական համայնքում ունենք հասարակական տրանսպորտի բացակայության խնդիրը, բայց պատրաստվում ենք դա լուծել։ Այս մասին կառավարության անդամների հետ հարցուպատասխանի ժամանակ ասաց Տարածքային կառավարման և ենթակառուցվածքների նախարար Սուրեն Պապիկյանը՝ պատասխանելով իշխանական պատգամավոր Արմեն Խաչատրյանի հարցին։

«Համայնքների մեծ մասում, հեռավոր համայնքներում այսօր տրանսպորտ չի մտնում, ինչը մտահոգիչ է։ Հնարավոր չէր շարունակել նախկինում եղած կարգը, այսինքն մրցութային հիմունքներով ունենալ որևէ ընկերություն, որը կսպասարկի այդ գյուղերը։ Պարզապես այդ ընկերությունները ցանկություն չունեն մասնակցել մրցույթներին, որովհետև շահավետ չէ»,-ասաց Սուրեն Պապիկյանը։

Նա ընդգծեց, որ կարող է պատահել՝ մեկ օրվա ընթացքում երկու քաղաքացի տվյալ գյուղ գնալու ցանկություն հայտնի։ Նախարարի խոսքով ծախսը և տված արդյունքն այս դեպքում անհամեմատելի են։ Տարածքային կառավարման և ենթակառուցվածքների նախարարությունն այժմ քննարկումների փուլում է և նախապես առաջարկում է խնդրի հետևյալ լուծումը. «Տարածքային զարգացման հիմնադրամի միջոցով խոշորացված համայնքների մի մասին, որոնք ցանկություն ունեցել են, տրամադրել ենք միջոցներ։ Այդ համայնքներից մի քանիսը կարողանում են իրենք իրականացնել ներհամայնքային սպասարկումը»,-նշեց նախարարը։

Նա մանրամասնեց, որ գաղափարն իրականացնելու համար անհրաժեշտ է կատարել մոտավորապես 500 մլն դրամ արժողությամբ ծախս, գնել նոր ավտոբուսներ, տրամադրել խոշորացված համայնքներին։ Տվյալ համայնքները կստեղծեն իրենց համար ընկերություն, որն էլ կսպասարկի ներհամայնքային ուղևորափոխադրումները. «Այսինքն` համայնքն այդ մարդկանց օրը երկու անգամ բերում է շրջանային կենտրրոններ ու տանում հեռավոր համայնքներ, իսկ արդեն մրցույթով հաղթած ընկերությունները նրանց տեղափոխում են մարզկենտրոն և մայրաքաղաք»,-պատգամավորներին հարցի լուծումը ներկայացրեց Սուրեն Պապիկյանը՝ նկատելով, որ դեռևս պետք է քննարկեն այս գաղափարի տնտեսական մասը։

Հեղինակ` Հասմիկ Կոշկարյան