Փաստ ինֆո

«Նաիրի Հունանյանը 20 տարի առաջ հնարավորություն ուներ իր նկատմամբ նախաքննությունը մեղմելու, եթե նախաքննական մարմնի հետ համագործակցության արդյունքում հնարավորություն տար ՀՀ-ին՝ հասկանալու, թե հոկտեմբերի 27-ին ինչ է տեղի ունեցել»,-այս մասին այսօր լրագրողների հետ ճեպազրույցում ասաց ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։

Հիշեցնենք, որ «Հոկտեմբերի 27-ի» ահաբեկչության կազմակերպիչ Նաիրի Հունանյանը Սեպտեմբերի 11-ին դիմում է ներկայացրել` վաղաժամկետ ազատ արձակման խնդրանքով։

Քոչարյանի տպավորությամբ, սկզբնական փուլում Նաիրի Հունանյանի խմբի անդմաներն աջակցություն ստանալու ակնկալիքներ են ունեցել և այն չստանալուց հետո հոգեբանորեն պատրաստ են եղել համագործակցել նախաքննական մարմնի հետ.

«Ինքներդ էլ տեսաք՝ ինչպիսի վախեր, խոչընդոտներ առաջացան հնարավոր բացահայտումների առումով և այն ժամանակ տարբեր շրջանակներ իրենց վախերից ելնելով ամեն ինչ անում էին, որ լիարժեք բացահայտումը կամ տեղի չունենար կամ էլ տեղի ունենար իրենց ուզած ձևաչափի սահմաններում։ Նկատելի էր, որ այդպիսի վախեր ուներ նաև այն ժամանակվա իշխանությունը ներկայացնող Ռոբերտ Քոչարյանն իր թիմով, որովհետև հիշում եք՝ այդ թիմի անդամներից կասկածյալներ կային և Ալիկ Հարությունյանը կալանքի տակ էր ու պրոցեսներն այնպես ընթացան, որ ամեն ինչ արվեց Ռ. Քոչարյանի կողմից, որպեսզի այդ բացահայտումը տեղի չունենա...»,-ասաց Քոչարյանը։

Նա ընդգծեց, որ իրավական ընթացակարգով Նաիրի Հունանյանը կարող է դիմել խնդրի լուծման համար, սակայն 20 տարի ուշացել է. «Հիմա Նաիրի Հունանյանը, եթե այդպիսի ցանկություն ունի, ունի ինֆորմացիա, որն էապես հնարավորություն կտա ՀՀ-ին իմանալու՝ հոկտեմբերի 27-ին ինչ է տեղի ունեցել, ապա այս հայտարարությունը հնարավորություն է, որ վերջապես 20 տարի հետո Հունանյանը հանդես գա ասելիքով, քանի որ որևէ մեկը չի հավատացել, որ դա «ուչաստկովի» գործ էր»։

Քոչարյանը, խոսելով Հունանյանի հնարավոր հոգեկան խնդիրների մասին, ասաց՝ տեղյակ է, որ նման խնդիրներ է ունեցել իր մայրը և քեռին։
«Նաիրի Հունանյանն ու իր խմբի անդամները չէին կարող հոգեկան խնդիրներ չունենալ, քանի որ հոգեկան խեղումներով մարդկանց են միշտ օգտագործում նման հանցագործություններին մեղմելու համար»,-ասաց Անդրանիկ Քոչարյանը։

Հունանյանի բանտից դուրս գալն արդյոք ազդա՞կ է, որ ինքն ասելիք ունի հարցին ի պատասխան՝ պաշտպանության և անվտանգության հարցերի մշտական հանձնաժողովի նախագահն ասաց. «Ոչ, դա կարող է այլ ազդակ էլ լինել, երևի իրեն ինչ-որ մարդիկ հույս են տվել, որ կարող է ազատության մեջ հայտնվելու հնարավորություն ունենալ, բայց դրանք հաստատ իշխանությունների հետ կապ չունեն»։

Հեղինակ` Սոնա Գեւորգյան