Փաստ ինֆո

«Նաիրի Հունանյանի դիմումը կբավարարվի, թե ոչ, դա բացառապես դատարանի որոշումն է, մենք չեն կարող դրա հետ կապված կանխակալ վերաբերմունք դրսևորել»,-այս մասին այսօր լրագրողների հետ ճեպազրույցում ասաց ԱԺ «Լուսավոր Հայաստան» խմբակցության պատգամավոր Տարոն Սիմոնյանը։

Հիշեցնենք, որ «Հոկտեմբերի 27-ի» ահաբեկչության կազմակերպիչ Նաիրի Հունանյանը սեպտեմբերի 11-ին դիմում է ներկայացրել` վաղաժամկետ ազատ արձակման խնդրանքով։

Սիմոնյանն ասաց, որ ինքը չի հանդիպել Հունանյանի հետ, բայց տեղյակ է, որ թե՛ նախորդ գումարման և թե՛ այս գումարման պատգամավորներից մի քանիսն այցելել են Հունանյանին։

Հարցին, հոկտեմբերի 27-ի գործը վերանայվելու անհրաժեշտություն ունի՞, ԼՀԿ խմբակցության պատգամավորը պատասխանեց, որ հասարակության ընկալմամբ այն ամբողջությամբ չի բացահայտվել և կան մարդիկ, ովքեր իրական մեղավորներն են այդ գործում ու ազատազրկման մեջ չեն։

«Սա հասարակական ընկալումն է, և ես էլ մասնակիորեն կարող եմ ասել, որ ինձ մոտ կան կասկածներ, որոնք ամբողջությամբ չեն փարատվել։ Հույս ունեմ՝ ինչպես մարտի 1-ի գործն է քննարկման առարկա դարձել, այնպես էլ հոկտեմբերի 27-ը պետք է լիարժեքորեն բացահայտվի, որպեսզի որևէ կասկած չլինի»,-ասաց պատգամավորն ու ընդգծեց, որ նաև կողմ չէ անընդհատ հետ վերադառնալուն ու անցյալը փորփրելուն։

Խոսելով ԱԺ աշխատակազմի ղեկավարի նախկին տեղակալ Արսեն Բաբայանի ձերբակալության մասին՝ Սիմոնյանն ասաց. «Այն հոդվածի, որի համար տեղի է ունեցել ձերբակալությունը համաներման տակ ընկնող հոդված էր և բնականաբար այդ ձերբակալությունը պետք է տեղի չունենար։ Եթե դա տեղի է ունեցել թյուրիմացության արդյունքում,ապա նրան պետք է անհապաղ ազատ արձակեին։ Ինչքանով տեղյակ եմ հոդվածը փոխվել է և այն չի ընկնում համաներման տակ, հիմա այդ հարցի հետ կապված քաղաքական հետապնդման հարց չի կարող ծագել, քանի որ դեռևս իրավական դաշտում տեղավորվում է։ Հետագայում, եթե իրավական դաշտում չտեղավորվի նոր հոդվածի հետ կապված, մենք կբարձրաձայնենք ինչպես երեկ բարձրաձայնեցի»։

Հեղինակ` Սոնա Գեւորգյան