Փաստ ինֆո

Երևանի ընդհանուր իրավասության դատարանում ավարտվեց ՊԵԿ նախկին նախագահ Գագիկ Խաչատրյանի կալանքի ժամկետը երկարացնելու հարցի քննությունը։ Որոշումը կհրապարակվի վաղը։ Լրագրողների հետ զրույցում այս մասին ասաց Գագիկ Խաչատրյանի պաշտպան Երեմ Սարգսյանը։

Նա նշեց, որ միջնորդության քննությանը մասնակցել են նաև դատախազության և քննչական մարմնի ներկայացուցիչները, որոնք իրենց տեսանկյունից հիմնավորել են՝ ինչու անձը պետք է շարունակի մնալ կալանքի տակ. «Նրանց հիմնավորումներն ըստ էության նույնն են։ Պնդում են, որ ազատության մեջ մնալու դեպքում Գագիկ Խաչատրյանը կթաքնվի վարույթն իրականացնող մարմնից, կխոչընդոտի գործի քննությանը և այս տեսանկյունից գտնում են, որ գրավը չի կարող երաշխիք լինել, նրան ազատության մեջ պահելու որևէ հնարավորություն չկա և պարտադիր պետք է կալանքի տակ գտնվի»,-ասաց Երեմ Սարգսյանը։

Նա ընդգծեց, որ իրենց հակափաստարկներն օբյեկտիվ և տրամաբանական են. «Բազմիցս ասել ենք, որ Գագիկ Խաչատրյանը գտնվել է Գերմանիայում հետվիրահակտական պարտադիր փուլում, բայց քննիչի ընդամենը մեկ հեռախոսային զանգով դադարեցրել է բուժումը, վերադարձել ու ներկայացել քննիչին՝ հույս ունենալով, որ գոնե մեկ շաբաթով թույլ կտան գնալ ու նորից բուժում ստանալ»,-ասաց Երեմ Սարգսյանը։

Հիշեցնենք, որ Գագիկ Խաչատրյանը ձերբակալվել էր օգոստոսի 27-ին։ Նրան մեղադրանք էր առաջադրվել պաշտոնեական լիազորությունները չարաշահելու եւ առանձնապես խոշոր չափերի գույքի վատնում կատարելու համար, ինչից հետո միջնորդություն էր ներկայացվել դատարան՝ նրա նկատմամբ որպես խափանման միջոց կալանավորումն ընտրելու վերաբերյալ, ինչը բավարարվել էր։
Ավելի ուշ հայտնի էր դարձել նաև, որ Խաչատրյանի վերաբերյալ մեկ այլ քրեական գործ էլ քննվում է ՀՔԾ-ում, որի շրջանակներում նա մեղադրվում է 38-179-րդ հոդվածի 3-րդ մասի 1-ին կետով, այն է՝ առանձնապես խոշոր չափերի վատնում կազմակերպելը։ Այս գործով նրա նկատմամբ որպես խափանման միջոց էր ընտրված ստորագրություն՝ չհեռանալու մասին։

Հետագայում նշված քրեական գործը ՀՔԾ-ն ուղարկեց ԱԱԾ, որտեղ երկու գործերը միացվեցին մեկ վարույթում։

Հեղինակ` Հասմիկ Կոշկարյան