Փաստ ինֆո

ՀՀ վարչապետ Նիկոլ Փաշինյանն անդրադարձել է իր կողմից մի շարք նախարարների, փոխնախարարների աշխատավարձերի բարձրացմանն ու ասել, որ իր որոշման արդյունքում նաև որոշ պաշտոնյաների աշխատավարձեր են իջել։

«Անցած տարի պարգևատրումների սկանդալի արդյունքում մենք նաև այս դահլիճում բազմիցս քննարկումներ ենք ունեցել ու արձանագրել որոշակի անհամամասնություն։ Հիմա այս որոշման արդյունքում ոմանց աշխատավարձն իջել է և ոմանցը բարձրացել»,-ասաց Փաշինյանը։

Նա ընդգծեց, որ խնդիր է դրվել, որպեսզի նույն կարգավիճակի մարդիկ ստանան նույն աշխատավարձը։

«Մենք այս պրոցեսը հրապարակային ենք իրականացրել, որովհետև 2019թ-ի բյուջեի քննարկումների արդյունքում ես այս ամբիոնից լրագրողների հետ զրույցում ասել եմ, որ եթե նախկինում պարգևատրումային ֆոնդ ունեին ընդամենը մի քանի մարմիններ, ապա մենք հիմա 30 տոկոսի չափով բոլոր մարմինների համար սահմանում ենք պարգևատրումների ֆոնդ։ Բյուջետային քննարկումների ժամանակ բոլորդ իմացել եք դրա մասին և քվեարկել դրա օգտին»,-շեշտեց ՀՀ վարչապետը։

Նա ընդգծեց, որ ինքը ԱԺ-ի ամբիոնից պարգևատրումային «սկանդալի» ժամանակ պաշտպանել է այն դիրքորոշումը, որ պաշտոնյաները պետք է ստանան արժանապատիվ վարձատրություն։

«Բացի դա՝ նաև այս ամբիոնից հայտարարել եմ, որ ԱԱԾ, Ոստիկանության և այլ մարմիններում այդ պարգևավճարներով մենք աշխատավարձերը փաստացի բարձրացրել ենք, այսինքն` հիմա որ ասում եք՝ առանց օրենքի փոփոխության է տեղի ունեցել, ասեմ, որ ԱԺ-ն ընդունել է բյուջե, որում այս պարգևատրումների ֆոնդերը նախատեսված են եղել»,-ասաց Փաշինյանը։

Նրա խոսքով, այս փոփոխություններն եղել են, որպեսզի պաշտոնյան ազատվի այն անհարմար իրավիճակից, երբ ինքն իրեն պարգևատրում է նշանակում. «Այսինքն՝ մենք համարել ենք, որ դրա մասին բավարար չափով հանրության հետ քննարկում ենք ունեցել և ԱԺ-ում քննարկումներ են եղել, որպեսզի այդ հարցը լուծվի»։

Խոսելով հանձնարարականի գաղտնիության մասին, Փաշինյանն ասաց, որ այդպիսի բան հնարավոր չէ, քանի որ նախարարները լրացնում են հայտարարագիր, որը տեղադրվում է կայքում և հասանելի է ցանկացած մարդու։

«Այն, որ գաղտնի է գնացել այդ հանձնարարականը, դա ներքին ընթացակարգային հարց է եղել, որովհետև մեկինն իջել է, մյուսինը՝ բարձրացել։ Ի վերջո` եկեք արձանագրենք, որ մենք նախարարությունների միացումներ ենք ունեցել։ Հիմա նախարարներ կան, որ 3 նախարարի աշխատանք են անում»,-շեշտեց Փաշինյանը։

Ի պատասխան վարչապետի հայտարարությանը, ԱԺ «Լուսավոր Հայաստան» խմբակցության ղեկավար Էդմոն Մարուքյանն ասաց, որ համաձայն է Փաշինյանի խոսքերի հետ, սակայն աշխատավարձերը 30 տոկոսից բարձր են սահմանվել, իսկ բյուջեի ֆոնդը հաստատվելիս խոսքը եղել է 30 տոկոսի մասին։

«30 տոկոսի մասին խոսել ենք, բայց չենք ասել, որ 30 տոկոս է աշխատավարձերը բարձրանալու, ասել ենք, որ այդ գերատեսչության բյուջեից աշխատավարձի ֆոնդի 30 տոկոսի չափով սահմանվելու է պարգևատրումային ֆոնդ, այսինքն` Կառավարությունը կարող է այդ 30 տոկոսն իր հայեցողությամբ օգտագործել»,-պատասխանելով Մարուքյանի դիտարկմանը ասաց Փաշինյանն ու հայտնեց, որ մեկ այլ սկզբունք է առաջարկվել, ըստ որի, ոչ թե պարգևատրումները կարող են լինել ավտոմատ, այլ հայեցողական, որպեսզի նախարարները կարողանան լավ աշխատողին խրախուսել, վատին՝ ոչ։

Հեղինակ` Սոնա Գեւորգյան