Փաստ ինֆո

Դատարանն ստացել է ԱԺ աշխատակազմի ղեկավարի նախկին տեղակալ Արսեն Բաբայանին կալանավորելու միջնորդությունը։

Այս մասին «Փաստինֆո»-ին ասաց Արսեն Բաբայանի պաշտպան Երվանդ Վարոսյանը։ «Արսեն Բաբայանի ձերբակալման իրավաչափության հարցի քննարկման հարցով նիստը պետք է տեղի ունենար երեկ, տեղի չունեցավ, հետաձգվեց եւ նշանակվեց այսօր՝ 17։40-ին։ Ինչպես մենք ենթադրում էինք, դա արվեց նրա համար, որ վարույթն իրականացնող մարմինը խափանման միջոց կալանավորումն ընտրելու մասին միջնորդություն ներկայացնի դատարան, դատարան էլ դրանք համատեղ քննի»,-ասաց փաստաբանը։

Հիշեցնենք, հոկտեմբերի 21-ին պաշտոնեական կեղծիք կատարելու կասկածանքով ձերբակալվել է ԱԺ աշխատակազմի ղեկավարի նախկին տեղակալ Արսեն Բաբայանը։ Նույն օրը փաստաբանները դատարան են մուտքագրել բողոքը՝ ձերբակալելու որոշման դեմ, սակայն դատարանը ձգձգեց բողոքի քննարկումը՝ ըստ էության ժամանակ տալով, որ ՀՔԾ-ն մեղադրանք առաջադրի ու կալանավորելու հիմքեր գտնի։ Արդյունքում երեկ երեկոյան՝ Արսեն Բաբայանին մեղադրանք առաջադրվեց ՀՀ քրեական օրենսգրքի 38-300-րդ հոդվածի 1-ին մասով և 314-րդ հոդվածի 1-ին մասով նախատեսված այն հանցավոր արարքների կատարման համար, որ նա, 2018 թվականին հանդիսանալով ՀՀ ազգային ժողովի աշխատակազմի ղեկավարի տեղակալի պաշտոնակատար, օժանդակել է մի խումբ պաշտոնատար անձանց կողմից ՀՀ սահմանադրական դատարանի լիազորություններին տիրանալուն, ինչպես նաև կատարել է պաշտոնեական կեղծիք: Նույն քրեական գործի շրջանակներում որպես կասկածյալ է ներգրավվել ՀՀ ԱԺ նախկին նախագահ Արա Բաբլոյանը` իշխանությունը յուրացնելու կասկածանքով:

Անդրադառնալով, մասնավորապես, իշխանության յուրացման մեղադրանքին Երվանդ Վարոսյանն ասաց, որ անգամ տեսականորեն խոսք չի կարող գնալ ՍԴ-ի լիազորությունները յուրացնելու մասին։ «ՍԴ-ի լիազորությունները սահմանված են Սահմանադրությամբ, ՍԴ գործունեության սկզբունքը եւս նախատեսված է Սահմանադրությամբ, եւ բնականաբար, նկարագրված գործողություններ անգամ, եթե համապատասխանեին իրականությանը,միեւնույնն է ՍԴ-ի լիազորությունների յուրացման մասին խոսք լինել չի կարող։ Ես ուղղակի զարմանում եմ, թե ինչ պատկերացում է ունեցել վարույթն իրականացնող մարմինը ՍԴ –ի լիազորություններ ասելով»։

Վարոսյանի խոսքով, ՍԴ-ի լիազորությունները յուրացնելը, պատկերավոր ասված, Պինոչետի կողմից ռազմական հեղաշրջման ժամանակ իշխանություն վերցնելն ու ՍԴ-ի գործունեությունը դադարեցնելուն ու նրա գործառույթները, օրինակ, ինչ-որ գնդապետի հանձնարարելը կլիներ։

«Եթե Սահմանադրական դատարանը առկա է, գործում է, կոլեգիալ կարգով կայացվում են որոշումներ, որեւէ կապ չունի, նախագահն ընտրվում է 6 տարով, թե մինչեւ 70 տարին։ Ոչ մի կապ չունի ու չի կարող ունենալ։ Երկրորդ, նկարագրվածը, թե Գագիկ Հարությունյանի հրաժարականի դիմումը մարտի 2-ով են գրանցել, այդ ամենը իրականության հետ որեւէ կապ չունի։ Երբ ես երեկ նշում էի, որ Արսեն Բաբայանին մեղադրող ցուցմունք գոյություն չունի, ես հենց սրա մասին էի խոսում։ Հրաժարականի դիմումը մարտի 2-ին եղել է ԱԺ-ում, հենց ամսի 2-ին էլ ԱԺ կայքում հայտարարությունը տարածվել է, վերջ, այստեղ քննարկելու որեւէ բան չկա»,-շեշտեց Երվանդ Վարոսյանը՝ հավելելով, որ եթե տեսականորեն ընդունենք, որ այդ դիմումը մարտի 5-ին է ընդունվել, բայց ձեւակերպումն արվել է մարտի 2-ին, միեւնույնն է, այստեղ հանցակազմի մասին խոսք լինել չի կարող , իսկ ՍԴ-ի լիազորությունները յուրացնելու մասին անգամ տեսական դատողական գնահատական տալն է անհնար։

Աղբյուր` Փաստինֆո