Փաստ ինֆո

Այն պահին, երբ ՍԴ-ն մերժեց ՍԴ նախագահ Հրայր Թովմասյանի լիազորությունները դադարեցնելու մասին ԱԺ դիմումի քննությունը, իշխանության համար վերջինիս պաշտոնանկությանը հասնելու իրավական ճանապարհը փակվեց, ուստի իշխանությունը փրփուրներից է կառչում։

Այս մասին «Փաստինֆո»-ի հետ զրույցում ասաց քաղտեխնոլոգ Արմեն Բադալյանը՝ անդրադառնալով վերջին 2 օրերի զարգացումներին։

Հիշեցնենք՝ երեկ ՀՀ ՍԴ նախագահ Հրայր Թովմասյանին առնչվող քրեական գործով ձերբակալվեց ԱԺ աշխատակազմի ղեկավարի նախկին տեղակալ Արսեն Բաբայանը՝ կեղծիք կատարելու համար, իսկ այսօր հայտնի դարձավ, որ նույն գործի շրջանակում ԱԺ նախկին նախագահ Արա Բաբլոյանը ներգրավվել է որպես կասկածյալ՝ իշխանությունը յուրացնելու համար։

«Իշխանությունը ձեռքերը փրփուրներին է գցում, փորձում է հետաքննել ու պարզել, թե ՍԴ նախագահի հոր տան տանիքը ե՞րբ ու որքա՞ն գումարով են կառուցել, նրա դուստրերը որտեղի՞ց են մեքենան ու ավտոտնակը ձեռք բերել։ Այդտեղից էլ կարծես բան չի ստացվում եւ հիմա փորձում են ԱԺ արխիվն ուսումնասիրելով, տեսնել, թե ինչպես է Հրայր Թովմասյանը ՍԴ նախագահ դարձել։ Այդ ամենին փորձում են տալ իրավական դիզայն, սակայն ակնհայտ է, որ սա քաղաքական գործընթաց է եւ հասկանալի է, որ իշխանությունն այլեւս որեւէ հնարավորություն չունի հասնելու ՍԴ նախագահի հրաժարականին, մինչեւ նա հրաժարական չտա, իսկ նա հրաժարական տալ չի պատրաստվում»,-ասաց քաղտեխնոլոգը՝ հավելելով, որ Հրայր Թովմասյանը ունի նաեւ ԵՄ անթաքույց աջակցությունը։
Մասնավորապես, քաղտեխնոլոգը հիշեց Հայաստանում Գերմանիայի դեսպանի «քաղաքակրթական» այցելությունը ՍԴ, որը տեղի ունեցավ ՍԴ որոշման ընդունումից օրեր առաջ։

Արմեն Բադալյանի խոսքով, ՍԴ նախագահին հրաժարական պարտադրելու հարցը Նիկոլ Փաշինյանի համար սկզբունքային է դարձել մի քանի պատճառով՝ քաղաքականից մինչեւ հոգեբանական։

«Ես բազմիցս կրկնել եմ, որ վարչապետը անձնիշխանական համակարգ է կառուցում եւ ՍԴ-ն այդ համակարգից դուրս է։ Կա նաեւ հարցի հոգեբանական պահը, եթե վարչապետին չհաջողվի հասնել ՍԴ նախագահի հրաժարականին, ապա կաշխատի այն հանգամանքը, որ մյուսները կտեսնեն՝ հնարավոր է առանց հրաժարականի չկատարել իշխանության ցանկությունները։ Փաշինյանի մոտ այս հոգեբանական պահն է, քանի որ նա բավականին զգուշավոր է իր վարկանիշի անկման հարցում։ Նրա մոտ «Մաուգլի» մուլտֆիլմից հայտնի «Акела промахнулся. Стае нужен новый вожак» հոգեվիճակն է, նա վախենում է, որ կասկած կարող է առաջանալ հենց իր շրջապատում եւ մտածում, է, որ եթե հանկարծ իրեն չհաջողվի այս հարցում հաջողության հասնել, իր շրջապատը կտեսնի, որ ինքն ամենահզորը չէ, իսկ նա մեկ ու կես տարի իր կերպարը պատրաստել էր որպես Հայաստանի ամենահզոր գործիչը։ Հիմա այդ կերպարը կոտրվում է»։

Բադալյանի խոսքով, գրպանային ՍԴ-ն Փաշինյանին հարկավոր է նաեւ տարբեր հարցեր անխոչընդոտ լուծելու համար՝ Սահմանադրական հանրաքվեից մինչեւ Ստամբուլյան կոնվենցիա։ «Կան հարցեր, որոնք ՍԴ-ով պետք է անցնեն եւ հասկանալի է, թե գործող ՍԴ-ն ինչ որոշումներ կարող է կայացնել։ Դա շատ լավ հասկանում են նաեւ ՍԴ-ում։ Նրանք հասկանում են, որ վարչապետը բացի զգայական կսմթոցներից ռեալ իրավական լծակ չունի ՍԴ-ի վրա ազդելու եւ դրա համար էլ ՍԴ դատավորները հրաժարական չեն տալիս»։

Քաղտեխնոլոգը ամենեւին զարմանալի չի համարում, եթե այլ քրեական գործ «մոգոնվեն» այս նպատակին հասնելու համար։ «Չենք կարող ասել, թե էլ ինչ կարող է ծագել վարչապետի գլխում, էլ որ հարցը կարող են քննարկել, բայց կա մի կարեւոր խնդիր, Հայաստանը ԵԽ անդամ է, որտեղ ամեն ինչ գերազանց տեսնում են»,-եզրափակում է Արմեն Բադալյանը։

Աղբյուր` Փաստինֆո