Փաստ ինֆո

Արսեն Բաբայանի ձերբակալության որոշման դեմ բողոքի քննությունը ձգձգվում է, որ քննչական մարմինները հասցնեն Արսեն Բաբայանին կալանավորելու համար հիմքեր նախապատրաստեն։ Քիչ առաջ նման հայտարարությամբ է հանդես եկել միջազգային իրավունքի մասնագետ Ռուբեն Մելիքյանը, որը մասնակցում է ի պաշտպանության Արսեն Բաբայանի այս պահին դատարանի մոտ տեղի ունեցող բողոքի ակցիային։

Նա տեղեկացրեց, որ այս պահին քննչական գործողություններ են ընթանում և Արսեն Բաբայանին մեղադրանք է առաջադրվում կամ էլ արդեն առաջադրվել է։

«Իրավաբանական հանրության մեծամասնության կողմից տարակուսանքն առաջադրված մեղադրանքի և ձերբակալման կապակցությամբ ազդել է քննչական մարմնի վրա և կարծեք թե այլ մեղադրանք է առաջադրվում՝ իշխանությունը յուրացնելու օժանդակության համար»,-շեշտեց Մելիքյանը։

Մելիքյանը լրագրողներին հայտնեց, որ ուզում է հասկանալ, թե ինչի համար է մեղադրվում իշխանության բավականին ակտիվ քննադատ Արսեն Բաբայանին։

Նա նշեց, որ եթե մեղադրանքն առաջադրվեր 314-րդ հոդվածով, ապա դա Արսեն Բաբայան ազատության համար որևէ բացասական հետևանք չէր կարող առաջացնել. «Ինչպե՞ս կարելի է անձին կալանավորել, ձերբակալել մի հոդվածով, որն իրենց չի ենթադրում ազատազրկում։ Միանշանակ չպետք է ձերբակալեին Բաբայանին, և ես կարծում եմ, որ այն բողոքի, տարակուսանքի ալիքը, որ հասարակության մեջ երեկվանից սկսեց ստիպել է մեր իրավապահ մարմիններին, որ մեկ այլ բան մտածեն, մեկ այլ հանցակազմ գտնեն։ Այդ հանցակազմը փաստորեն իշխանությունը զավթելու օժանդակությունն է»։

Դիտարկմանը, որ Արսեն Բաբայանը ձերբակալել է փախուստը կանխելու նպատակով, միջազգային իրավունքի մասնագետը պատասխանեց. «Իրավաբանորեն ՀՔԾ-ն ճիշտ է, այսինքն` իսկապես ձերբակալումն այդ նպատակով է կիրառվում, բայց ամբողջ հարցն այն է, որ եթե մարդուն չի սպառնում մի իրավիճակ, երբ նա կարող է ազատազրկվել, ապա ինչու՞ պետք է փախուստի դիմի»։

Մելիքյանը հարցրեց, թե քանի՞ դեպք է եղել, որ նման իրավիճակներում անձը ձերբակալվել կամ կալանավորվել է. «Չի եղել նման պրակտիկա մեր երկրում, սա մեր երկրի պրակտիկային հակասող երևույթ է։ Լավ, թե վատ փոքր առաջընթաց ենք գրանցել մեր քրեական դատավարության ոլորտում և հիմա շատ արագ դա կորցնում ենք։ Շատ ցավալի է»։

Աղբյուր` Փաստինֆո