Փաստ ինֆո

Երեւանի ընդհանուր իրավասության դատարանը ձգձգում է ՀՀ ԱԺ աշխատակազմի ղեկավարի նախկին տեղակալ Արսեն Բաբայանի պաշտպանների բողոքի քննությունը, որով վիճարկվում է Արսեն Բաբայանի ձերբակալման իրավաչափությունը։

«Փաստինֆո»-ն արդեն տեղեկացրել է, որ Բաբայանի պաշտպանների դիմումը դատարան է մուտքագրվել հոկտեմբերի 21-ի երեկոյան՝ 21:04-ին։ Բողոքի քննությունը մակագրվել է Երևանի ընդհանուր իրավասության դատարանի դատավոր Կարեն Ֆարխոյանին։ Համաձայն Սահմանադրության, բողոքի քննությունը պետք է իրականացվի սեղմ ժամկետներում՝ առավելագույնը 18 ժամվա ընթացքում։ Արդեն հայտնի է , որ դատարանը բողոքը քննելու է 18.30-ին՝ դռնփակ նիստով։

Հիշեցնենք՝ Արսեն Բաբայանը ձերբակալվել է ՀՀ ՍԴ նախագահ Հրայր Թովմասյանին առնչվող քրեական գործով։ ՀՔԾ-ի տարածած պաշտոնական հաղորդագրության համաձայն՝ փաստական տվյալներ են ձեռք բերվել այն մասին, որ պաշտոնատար անձինք ՀՀ սահմանադրական դատարանի նախկին նախագահ Գագիկ Հարությունյանի կողմից լիազորությունները վայր դնելու գործընթացում, խմբային շահերից ելնելով, անձամբ, ինչպես նաև պաշտոնատար անձ չհանդիսացող աշխատակիցների միջոցով կատարել են պաշտոնեական կեղծիքներ։ Նույն աղբյուրի փոխանցմամբ՝ ԱԺ աշխատակազմի ղեկավարի նախկին տեղակալ Արսեն Բաբայանը ձերբակալվել է ՀՀ ՔՕ 314-րդ հոդված 1-ին մասով նախատեսված հանցավոր արարք՝ պաշտոնեական կեղծիք կատարելու կասկածանքով ։

«Փաստինֆո»-ի տեղեկություններով քրեական գործը վերաբերում է ՍԴ նախկին նախագահ Գագիկ Հարությունյանի հրաժարականի դիմումին։ Հիշեցնենք, որ 2018 թվականի մարտի 1-ին հայտարարվեց ՍԴ նախագահի հրաժարականի մասին, որը ՍԴ-ի գրասենյակից ելքագրվել մարտի 2-ին, նույն օրը՝ ուրբաթ, մուտք եղել ԱԺ գրասենյակում, որը սակայն ներքին փաստաթղթաշրջանառության համակարգ ներբեռնվել է մարտի 5-ին՝ երկուշաբթի։ Ըստ տեղեկությունների, Արսեն Բաբայանին մեղսագրում են, որ նա է քարտուղարության աշխատակցին պարտադրել փոխել դիմումը՝ ԱԺ գրասենյակում ստանալու օրը։ Նշենք, որ մարտի 5-ին Արսեն Բաբայանը դեռեւս զբաղեցնում էր ԱԺ հասարակայնության հետ կապերի եւ հաղորդակցության վարչության պետի պաշտոնը։ Նրա նշանակումը՝ աշխատակազմի ղեկավարի տեղակալի պաշտոնում եղել է միայն մարտի 6-ին։

Իրավապաշտպանները Արսեն Բաբայանի ձերբակալությունը որակում են ապօրինի եւ քաղաքական։ «Պառլամենտարիզմի զարգացման միջազգային կենտրոն» ՀԿ համահիմնադիր Գոհար Մելոյանը հայտարարել է, որ Արսեն Բաբայանին մեղսագրվող ՀՀ քրեական օրենսգրքի 314-րդ հոդվածի 1-ին մասով նախատեսված արարքի վրա տարածվում է համաներում եւ նա չէր կարող ձերբակալվել։ «Հայաստանի Հանրապետությունում որևէ անձ չի կարող ազատությունից զրկվել, այդ թվում՝ ձերբակալվել կամ կալանավորել, ՀՀ քրեական օրենսգրքի 314-րդ հոդվածի 1-ին մասով նախատեսված այն արարքների համար, որոնք կատարվել են մինչև 2018 թվականի հոկտեմբերի 21-ը համաձայն՝ «Էրեբունի-երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» օրենքի»,- նշել ղ Գոհար Մելոյանը։ Իսկ Արցախի նախկին ՄԻՊ Ռուբեն Մելիքյանը հայտարարել է, որ Արսեն Բաբայանի ձերբակալության բուն նպատակը Հրայր Թովմասյանի նկատմամբ ճնշման «դոզան» ավելացնելն ու նրա դեմ ցուցմունք կորզելն է։

Հարցին արձագանքել է նաեւ Հայաստանի ՄԻՊ-ը՝ նշելով, որ Արսեն Բաբայանի ձերբակալության հետ կապված պարզաբանումներ է պահանջել ՀՔԾ-ից։
Արսեն Բաբայանի ձերբակալության ժամանակ ուղեկցված խախտումներն այնքան ցայտուն են, որ փորձագետները հույս ունեն, որ դատարանները չեն կարող պարզապես աչք փակել եւ կարճման ենթակա գործով անձի ձերբակալությունը իրավաչափ համարել ու թերեւս դա է դատական նիստի ձգձգման պատճառը։

Բացառված չէ, որ այս ընթացքում ՀՔԾ-ն փորձի առավել խիստ հոդվածով մեղադրանք առաջադրել եւ միանգամից հանդես գա Արսեն Բաբայանին կալանավորելու միջնորդությամբ։

Աղբյուր` Փաստինֆո