Փաստ ինֆո

«Ակնհայտ անհիմն, ապօրինի ձերբակալություն է, որը իրավունքի հետ ոչ մի առնչություն ունենալ չի կարող»,-անդրադառնալով ՀՀ ԱԺ աշխատակազմի ղեկավարի նախկին տեղակալ Արսեն Բաբայանի ձերբակալությանը, «Փաստինֆո»-ին ասաց Երվանդ Վարոսյանը։

Հիշեցնենք, որ երեկ Հատուկ քննչական ծառայությունը հաղորդագրություն էր տարածել, որի համաձայն՝ ՀՀ ՔՕ 314-րդ հոդված 1-ին մասով նախատեսված հանցավոր արարք կատարելու կասկածանքով ձերբակալվել է ՀՀ ԱԺ աշխատակազմի ղեկավարի նախկին տեղակալ Արսեն Բաբայանը։

«Այդ հոդվածը համաներման տակ է ընկնում, բայց շատ լավ իմանալով մեր իրավապահների աշխատելաոճը, չեմ զարմանա, եթե մոգոնվի ինչ-որ այլ հոդված, որը համաներման տակ չի ընկնում, բայց հարցը այստեղ անգամ դա չէ, որովհետեւ չի կարող լինել օրինական ձերբակալում այն դեպքում, երբ անձը իր կամքով ներկայանում է վարույթն իրականացնող մարմին, իր կամքով մտնում է ներս, բարձրանում է չգիտեմ որերորդ հարկ, մտնում է քննիչի աշխատասենյակ ու հետո կազմվում է ձերբակալման արձանագրություն։ Սա արդեն ֆարս է»,-ասաց փաստաբանը։

Մեր դիտարկմանը, թե վերջին շրջանում միտում է նկատվում, որ հարցաքննության կամ այսպես ասած, զրույցի համար իրավապահները անձին հրավիրում են, ապա ձերբակալում, Վարոսյանն արձագանքեց.«Դա խորհրդային ժամանակներից եկող մեխանիզմ է, որը ապօրինի է եւ որեւէ առնչություն չունի իրավունքի հետ ունենալ չի կարող։ Անձին կարող են ձերբակալել այնպիսի իրավիճակում, երբ կոնկրետ հանցագործություն է հենց հիմա տեղի ունենում եւ այլ տարբերակ չկա կամ հանցագործությունից հետո անձը փորձում է թաքնվել իրավապահ մարմիններից եւ նրան ձերբակալում են, որպեսզի եռօրյա ժամկետում ներկայացնեն դատարան։ Սա է ձերբակալման ռեժիմը»։

Հարցին, արդյո՞ք Բաբայանի ձերբակալությունը տեղավորվում է ՍԴ նախագահի շուրջ ընթացող զարգացումների շրջանակում, Երվանդ Վարոսյանը պատասխանեց.«Արդեն դա չտեսնող կա՞։ Չեմ պատկերացնում, որ որեւէ մեկը դա չի տեսնում։ Իհարկե, ես կարծում եմ, որ դեռ զարգացումներ լինելու են։ Արդեն այն փուլում ենք գտնվում, որ լինելու են եւ ձերբակալություններ եւ նոր ճնշումներ։ Իշխանությունն ինքն իրեն այլ տարբերակ չի թողել»։

Փաստաբանը արձանագրում է, որ ստեղծված իրավիճակը վտանգավոր է ոչ միայն երկրի ներկայի այլեւ ապագայի տեսանկյունից։ «Սա վաղվա համար էլ է տխուր նախադրյալներ ստեղծում, որովհետեւ իշխանափոխությունից հետո էլ նույն պատկերն ենք ունենալու։ Նոր իշխանությունները էլի ինչ-որ քրեական գործեր քննելու անհրաժեշտություն են ունենալու, ցավոք սրտի, և ի վերջո, այս տեղատարափը շարունակվելու է»,-եզրափակեց փաստաբանը։

Աղբյուր` Փաստինֆո