Փաստ ինֆո

Նախօրեին «Հետք» պարբերականը հրապարակեց մի հոդված,որտեղ նշվում էր, որ Նիկոլ Փաշինյանի գաղտնի հանձնարարականով էականորեն բարձրացել են նախարարների, փոխնախարարների և նախարարությունների գլխավոր քարտուղարների աշխատավարձերը։ Հանձնարարականը, ըստ պարբերականի տրվել է հուլիս ամսին: Այս թեմայի շուրջ «Փաստինֆո»-ն զրուցել է ՀՀ ԱԺ ֆինանսավարկային և բյուջետային հարցերի մշտական հանձնաժողովի փոխնախագահ Արտակ Մանուկյանի հետ։

- Ինչպե՞ս կմեկնաբանեք նախարարների, փոխնախարարների, գլխավոր քարտուղարների աշխատավարձերը գաղտնի ընթացակարգով բարձրացնելու վերաբերյալ հրապարակումը։

- Ցավոք պետք է արձանագրենք, որ մամուլում շրջանառվում է ինչպես ճիշտ ինֆորմացիա, այնպես էլ հատկապես վերջին շրջանում շրջանառվում են սխալ կամ միտումնավոր սխալ տեղեկություններ։ Դիտարկելով խնդրի բովանդակային կողմը՝ արդյոք պետական համակարգում աշխատավարձային քաղաքականությունը արտացոլում է այն իրավիճակը, որը կա ներկայումս, հատկապես բարձր պաշտոնատար անձանց մասով։ Կարծում եմ՝ ոչ, որովհետև նախկինում պետական պաշտոնյաներն իրենց գերատեսչության ընդհուպ մինչև տորթի բաժանման գործընթացին մասնակցելու հնարավորություններ են ունեցել, ինչի միջոցով բարձրացրել են իրենց բարեկեցությունը։ Առնվազն հիմա ակնհայտ է, որ քաղաքական կամքի առկայության պարագայում կան բավարար զսպումների և հակակշիռների մեխանիզմներ։ Եթե նույնիսկ լինի նման վարքագիծ, ապա կարծում եմ՝ բազմիցս ապացուցվել է, որ չկան այս մասով որոշակի արտոնություն ունեցողներ։ Այս համատեքստում էլ ավելի է կարևորվում, որ մենք աշխատավարձի նկատմամբ պետական համակարգում քաղաքականությունը պետք է փոփոխենք։ Մենք գաղտնի տեղեկատվության դասակարգման ցուցիչներ ունենք և կարծում եմ, որ թափանցիկության և հաշվետվողականության համատեքստում աշխատավարձերի վճարումներն այդ գաղափարախոսությունից որոշակի շեղում են իրենց մեջ պարունակում։ 

- Այնուամենայնիվ աշխատավարձերի բարձրացումը չպե՞տք է տեղի ունենար օրենքում համապատասխան փոփոխություններով։ Ի՞նչ ընթացակարգով է այն առհասարակ իրականացվում։

- Ավելի քան մեկ տարի է խոսում եմ սրա մասին, որ հեղափոխությունից հետո, ոչ միայն բարձրաստիճան պաշտոնյաների, այլ ընդհանուր պետական համակարգի աշխատավարձերի քաղաքականությունը պետք է ավելի կանխատեսելի և կատարողականների հիման վրա ամրագրված լինի, որն իրենից ենթադրում է նաև օրենսդրական փոփոխություններ։

Աղբյուր` Փաստինֆո