Փաստ ինֆո

«Ամեն ինչ հնարավոր է բացի նրանից, որ Արսեն Բաբայանի ձերբակալությունը քաղաքական ճնշում է և քաղաքական նշանակություն ունի»,-այս մասին այսօր լրագրողների հետ ճեպազրույցում ասաց ԱԺ փոխնախագահ Ալեն Սիմոնյանը՝ անդրադառնալով ԱԺ աշխատակազմի ղեկավարի նախկին տեղակալ Արսեն Բաբայանի ձերբակալությանը։

Հիշեցնենք, որ Արսեն Բաբայանը ձերբակալվել է երեկ՝ պաշտոնեական կեղծիք կատարելու կասկածանքով։

Նա շեշտեց, որ ՀՀ-ում դատական գործերի վրա նման միջամտություն չի կարող լինել. «Ցավով եմ իմացել այդ լուրը, բայց վստահեցնում եմ, որ նման բան բացառվում է»։

Հարցին, Հրայր Թովմասյանի հեռացումով կլուծվի՞ Սահմանադրական դատարանի ճգնաժամը, ԱԺ փոխնախագահը պատասխանեց. «Չեմ կարծում, որ դրա հետ կապված որևէ մեկնաբանություն պետք է տամ։ ՍԴ-ի և այդ անձի հետ կապված խնդիրը վաղուց կա և այն լուծվելու է, ուստի ավելացնելու բան չկա»։

Խոսելով «Հետքի» հրապարակման մասին, թե վարչապետ Նիկոլ Փաշինյանի գաղտնի հանձնարարականով էականորեն բարձրացվել են նախարարների աշխատավարձերը, Սիմոնյանն ասաց, որ աշխատավարձի բարձրացման հարցում մտահոգություն չունի։

«Կարծում եմ՝ ինչպես ուսուցիչների, զինվորական և մնացած բոլոր ոլորտների աշխատակիցների, մեր աշխատակազմերի, պետական հիմնարկների մարմինների աշխատողների աշխատավարձը պետք է բարձրացնել, որովհետև հաճախ մասնավորն ավելի լավ պայմաններ է առաջարկում և պետությունը չի դիմանում մրցակցությանը»,-ասաց ԱԺ փոխնախագահը։

Դիտարկմանը, գուցե դիմեք, որպեսզի պատգամավորների աշխատավարձն էլ բարձրացնեն՝ Սիմոնյանը պատասխանեց. «Առաջին հերթին, եթե ինչ-որ մեկի աշխատավարձը պետք է բարձրացվի դա պետական մարմնի աշխատակազմն է, մենք մի կերպ յոլա կգնանք...»։

Հեղինակ` Սոնա Գեւորգյան