Փաստ ինֆո

ՔԿ նախագահը նշանակվում և ազատվում է կառավարության որոշմամբ։ Երբ նպատակահարմար կգտնեն ազատել, այդ ժամանակ կխոսենք։ Այս մասին լրագրողների հետ զրույցում ասաց ՔԿ նախագահ Հայկ Գրիգորյանը՝ անդրադառնալով պաշտոնից ազատվելու վերաբերյալ շրջանառվող լուրերին։

«Հակակոռուպցիոն ռազմավարության շրջանակներում մի քանի կառուցվածքային փոփոխություններ նախատեսվում են։ Հակակոռուպցիոն ռազմավարության շրջանակներում նախատեսվում են մի շարք կառուցվածքային փոփոխություններ, որ կոմիտեին կցվելու են մի շարք այլ գերատեսչությունների քննչական ստորաբաժանումներ»,-ասաց Հայկ Գրիգորյանը։

Անդրադառնալով Ամուլսարի գործով քննչական խմբի նախկին ղեկավար Յուրա Իվանյանի նոր պաշտոնի մասին լուրերին, ՔԿ նախագահը նկատեց. «Խնդիրը կայանում է նրանում, որ կառավարության որոշումով ՔԿ-ում տեղի են ունեցել մի շարք կառուցվածքային փոփոխություններ, և նրա պաշտոնն ուղղակի վերանվանվել է։ Այսինքն նախկինում, եթե անվանվել է սեփականության դեմ ուղղված, կոռուպցիոն հանցագործությունների դեմ ուղղված և կիբերհանցագործությունների դեմ ուղղված հանցագործությունների քննության վարչություն, կիբերհանցագործությունների վարչությունն առանձնացվել է։

Այսինքն ինքը մնացել է իր պաշտոնում, պաշտոնն է վերանվանվել»,-ասաց Հայկ Գրիգորյանը։

Նա նաև հավելեց, որ Յուրա Իվանյանի նկատմամբ ծառայողական քննությունն իրականացվել է, որի արդյունքներով ՔԿ նախագահի պնդմամբ Յուրա Իվանյանը որևէ շահագրգռվածություն կամ կապ չի ունեցել. «Քրեական դատավարության օրենսգրքի համաձայն՝ հստակ նշվում են, թե այդ բարեկամական որ կապերի դեպքում է, երբ անձը պետք է ինքնաբացարկ հայտնի։ Իրենց ազգակցական կապը նշված չէ։ Զուտ իրավական առումով որևէ խնդիր չունենք և խախտում չկա»,-նշեց Հայկ Գրիգորյանը։

Հեղինակ` Հասմիկ Կոշկարյան