Փաստ ինֆո

«Իրավական մասով կարող եմ ասել, որ քրեական գործը հարուցվել է դեպքի առթիվ և Հրայր Թովմասյանն որևէ կարգավիճակ չունի այդ քրեական գործում, հանգամանքները պարզելու համար որոշ մարդիկ, իհարկե, հրավիրվում են Ազգային անվտանգության ծառայություն։ Իսկ քաղաքական մասով, եկեք վերհիշենք բոլոր այն գործընթացները, որոնք տեղի են ունեցել նախկինում»,-այս մասին այսօր լրագրողների հետ ճեպազրույցում ասաց ՀՀ փոխվարչապետ Տիգրան Ավինյանը, անդրադառնալով ՀՀ Սահմանադրական դատարանի նախագահ Հրայր Թովմասյանի հարազատներին Ազգային անվտանգության ծառայություն կանչելուն։

Ավինյանն ասաց՝ իր մոտ տպավորություն է ստեղծվել, թե տեղի ունեցող բոլոր պրոցեսներում մոռացվում է անցյալում տեղի ունեցածի մասին։

«Ես միանշանակ վստահ եմ, որ Սահմանադրական դատարանն այս պահին դրությամբ ունի լեգիտիմության խնդիր, ես չէի ուզենա որ որևէ գործընթաց դիտվեր որպես քաղաքական հետապնդում։ Քաղաքական առումով պետք է արձանագրել, որ իրականում խնդիր կա ՍԴ-ում և այն ինչ-որ ժամանակ լուծում պետք է ստանա»,-նշեց փոխվարչապետը։

Նրա խոսքով, Սահմանադրական դատարանի նկատմամբ հարգանք պետք է լինի, բայց հնարավոր չէ աչք փակել առկա խնդիրների վրա։

Անդրադառնալով Սահմանադրական դատարանի շուրջ ստեղծված իրավիճակի լուծմանը, Ավինյանն ասաց, որ դրա լուծման եղանակների վրա շարունակաբար պետք է աշխատել. «Գործադիրը՝ արդարադատության նախարարությունն որոշակի նախաձեռնություններ ունի, որպեսզի այս խնդիրը, այս թնջուկը լուծի»։

Հեղինակ` Սոնա Գեւորգյան