Փաստ ինֆո

Այսօր ՀՀ-ում գործում է երկու օրենսգիրք, մեկը «ՀՀ քրեական օրենսգիրքը» և «Նիկոլի օրենսգիրքը»։ «Փաստինֆո»-ի հետ զրույցում ասաց դերասանուհի Անահիտ Մութաֆյանը, ով կալանավորված Նարեկ Մութաֆյանի քույրն է։

«Նիկոլի օրենսգրքով դատվում են բոլոր այն մարդիկ, ովքեր այլակարծիք են։ Այսօր իմ եղբայրը և իմ լավ ընկեր Սարգիս Օհանջանյանը դատվում են Նիկոլի օրենսգրքով»,- ասաց Անահիտ Մութաֆյանը՝ շեշտելով, որ հարկ եղած դեպքում կդիմեն կտրուկ քայլերի՝ ՄԻԵԴ, Եվրոպական մամուլին։

Նշենք, որ այսօր Վերաքննիչ քրեական դատարանը քննարկում էր ՀՀ երկրորդ նախագահ Ռոբերտ Քոչարյանի աջակիցներ Նարեկ Մութաֆյանի և Սարգիս Օհանջանյանի խափանման միջոցի հարցը, սակայն դատական նիստերը հետաձգվեց մինչև հոկտեմբերի 23-ը։

«Եթե օրենքը ՀՀ-ում չի գործում, ես կխնդրեի դատավորներին գոնե խղճի մտոք դատական ակտ կայացնել և երկու երիտասարդներին ազատ արձակել։ Նարեկը տանը ունի հիվանդ մայր, ով վայրկյան-վայրկյան սպասում է իր որդուն։ Սարգիսը տանը ունի երկու տարեկան երեխա՝ ապագա զինվոր, որն ամեն վայրկյան պապա-պապա ասելով ման է գալիս»,- ասաց Անահիտ Մութաֆյանը՝ ընդգծելով, որ չի կարող դատավորներից որևէ բան պահանջել։

«Նրանք դարձել են, վարչապետի ասած, վնգստացող դատավորներ, ովքեր պատերի տակ նոր տերեր են փնտրում և, այո, նրանք գտել են այդ նոր տերերին։ Հիմա էլ նրանք պարում են վարչապետի դուդուկի տակ»,- նշեց տիկին Մութաֆյանը՝ հավելելով, որ որոշում կայացվի խղճին համապատասխան։

«Չեմ ասում օրինական, որովհետև օրինականության մասին մեր երկրում խոսելն արդեն դառնում է ծիծաղելի երևույթ։ Դու հայտնվում ես ծիծաղելի իրավիճակում, որովհետև օրենքը գործում է միայն այն մարդկանց հանդեպ, ովքեր Նիկոլի կողմնակիցները չեն» ,- ասաց տիկին Մութաֆյանը։

Նա մատնանշեց նմանատիպ դեպքեր. «Երբ Ռեստարտի լակոտները հարձակվեցին Նարեկ Մալյանի վրա և մնացին անպատիժ, երբ նիկոլական ինչ-որ երիտասարդներ հարձակվեցին «Հայելի» խմբագրության վրա և մնացին անպատիժ, երբ Նիկոլի ժողովուրդը Նիկոլի իսկ հրամանով փակեց դատարանների դռները, նույնիսկ դատավորին մարմնական վնասվածք հասցրեց՝ պատուհանից քաշել գցելով, երբ Նիկոլի կողմնակիցները ՍԴ դատավորին քաշքշեցին և սահմանափակեցին նրա ազատ տեղաշարժը ու մնացին անպատիժ, նրանց համար օրենք չի գործում։ Օրենքը գործում է միայն ՀՀ երկրորդ նախագահ Ռոբերտ Քոչարյանի կողմնակիցների հանդեպ և գործում է սխալ օրենք»։

Անահիտ Մութաֆյանը նշեց, որ մեր երկրում կա 4 քաղբանտարկյալ։

«Իմ երկիրը, որի պետականության համար ես իմ մանկությունն եմ տապալել, քաղբանտարկյալներ չպետք է ունենա։ Մեր երկրում այսօր արդեն կա չորս քաղբանտարկյալ՝ Մանվել Գրիգորյան, Ռոբերտ Քոչարյան, Նարեկ Մութաֆյան, Սարգիս Օհանջանյան»,- ասաց Անահիտ Մութաֆյան։

Ինչպես արդեն տեղեկացրել ենք, սեպտեմբերի 27-ի ուշ երեկոյան դատավոր Աննա Դանիբեկյանին, ում վարույթում է գտնվում Ռոբերտ Քոչարյանի եւ մյուսների վերաբերյալ քրեական գործը, մոտեցել են երկու երիտասարդ՝ Սարգիս Օհանջանյանը և Նարեկ Մութաֆյանը, ու ֆեյսբուքում ուղիղ եթերով հեռարձակում միացնելով, հետաքրքրվել, թե արդյոք նա կա՞ «վնգստացող դատավորների ցանկում»:

Դեպքին անմիջապես անձագանքել էր Բարձրագույն դատական խորհուրդը` նշելով, որ դատավորին տրվել է թիկնապահ, իսկ ԲԴԽ նախագահը մեկնել էր դեպքի վայր։ Հավելենք, որ Աննա Դանիբեկյանը կատարվածի վերաբերյալ հաղորդում էր ներկայացրել Ոստիկանությանը։

Հետագայում դեպքի առթիվ հարուցվել էր քրեական գործ 343-րդ հոդվածի 3-րդ մասով,սակայն մեղադրանքն առաջադրվել էր 332-րդ հոդվածի 1-ին մասով՝ արդարադատությանը խոչընդոտելու համար։

Նրանց նկատմամբ որպես խափանման միջոց է ընտրվել կալանավորումը, ինչի վերաբերյալ փաստաբանը ներկայացրել է վերաքննիչ բողոք։

Աղբյուր` Փաստինֆո