Փաստ ինֆո

Ես խոսել եմ Սահրատ Պետրոսյանի հետ մինչև հրաժարականի իր դիմումը հրապարակելը։ Ինքն այնտեղ ներկայացրել է իր տեսակետները, իր ունեցած խնդիրները քաղաքաշինության կոմիտեի նախկին ղեկավարի հետ, որն իմ օգնականն է, և ներկա ղեկավարի հետ։ Այս մասին լրագրողների հետ զրույցում ասել է ՀՀ փոխվարչապետ Տիգրան Ավինյանը՝ անդրադառնալով հարցին՝ արդյոք Անշարժ գույքի պետական կադաստրի կոմիտեի ղեկավար Սարհատ Պետրոսյանը փոխվարչապետի թիմի հետ ունեցած խնդիրների պատճառով է հրաժարականի դիմում ներկայացրել։

«Ինձ համար մի փոքր տրամաբանությունն ընդունելի չէ, որովհետև դա նույնն է, որ Առողջապահության նախարարը հրաժարական տա, որովհետև չի համաձայնում աշխատանքի և սոցիալական հարցերի նախարարի քաղաքականության հետ»,-ասաց փոխվարչապետը։

Տիգրան Ավինյանն ընդգծեց, որ Կադաստրի կոմիտեն ունի հստակ գործառույթներ. «Կադաստրի կոմիտեի նախագահի պաշտոնը հնարավորություն չէր տալիս քաղաքաշինության ոլորտում որոշակի գործունեություն ծավալել։ Ենթադրում եմ՝ պարոն Պետրոսյանը մի փոքր այս հարցից էր նաև հիասթափված»,-նշեց Տիգրան Ավինյանը։

Անդրադառնալով Սահրատ Պետրոսյանի հայտարարությանը, թե չի կարող հանդուրժել կոռումպացվածության հասնող թայֆայականությունը, Տիգրան Ավինյանն արձագանքեց. «Ինձ համար էլ է սա նորություն։ Կոռումպացվածության մասին որևէ պաշտոնյայի, որևէ խոսք անգամ չի գնացել»։

Տիգրան Ավինյանը նկատեց, որ իր անունը շրջանառվել է այնքանով, որ Կադաստրի կոմիտեի նախկին ղեկավարն այժմ իր օգնականն է. «Պարոն Պետրոսյանը, որը չի եղել Քաղաքաշինության կոմիտեի ղեկավար, դժվար ծանոթ լինի այն բոլոր խնդիրների խորքին, որոնք առկա են քաղաքաշինության ոլորտում։ Միգուցե թվում է, թե հարակից ոլորտ ղեկավարելով կարող ես բոլոր խնդիրների ծանոթ լինել, կարծում եմ՝ այդպես չէ»,-ասաց Տիգրան Ավինյանը՝ ընդգծելով, որ այնուամենայնիվ կադաստրի կոմիտեի ոլորտում դրական է գնահատում Սահրատ Պետրոսյանի աշխատանքը։

Հեղինակ` Հասմիկ Կոշկարյան