Փաստ ինֆո

«Իմ քայլը» խմբակցությունն է կրում քաղաքական պատասխանատվությունը մի մարդու համար, որը հարկատուներից գոյացող գումարներից ստանում է աշխատավարձ եւ չի աշխատում։ Վահե Գրիգորյանը անգամ հեղափոխության թիմի եւ հեղափոխության թիմի ակնկալիքներն է փոշիացնում, որովհետեւ գոնե Հրայր Թովմասյանի եւ մյուս 2 դատավորների՝ նիստին չմասնակցելու միջնորդությունը նա կարող էր անել վարույթ ընդունելու փուլում, ինչը օրենքով սահմանված կարգով է, մինչդեռ նա նիստին չէր մասնակցել եւ նիստին չմասնակցելով բաց էր թողել ժամկետները, որից հետո իր ներկայացրած դիմումը ՍԴ-ում համարել էին գրություն եւ չէին քննարկել»,-1in.am-ին տված հարցազրույցում հայտարարել է ԱԺ «Լուսավոր Հայաստան» խմբակցության պատգամավոր Էդմոն Մարուքյանը ՝ անդրադառնալով ՍԴ նախագահ Վահե Գրիգորյանի՝ ՍԴ աշխատանքներին չմասնակցելու հարցի վերաբերյալ ԼՀԿ-ի դիրքորոշմանը։

Ըստ Մարուքյանի, մեծ հանրային ակնկալիքներով նա խորհրդարանի կողմից ընտրվել է եւ չի աշխատում։ «Ասել է, թե ՍԴ գոյություն չունի, հետեւաբար իրավազոր նիստեր չեն եղել, շատ լեգիտիմ հարց է առաջանում՝ բա դու ի՞նչ կապ ունես էդ մարմնի հետ, ի՞նչ կապ ունես էդ մարմնի հետ, եթե մարմինը չկա»,-ասել է Մարուքյանը՝ հավելելով, որ չեն կիսում Վահե Գրիգորյանի մոտեցումները։
Մարուքյանը շեշտել է՝ աշխատավարձը, որը փոխանցվում է Վահե Գրիգորյանի քարտին, հարկատուների միջոցներն են, որը նա ստանում է, որպեսզի աշխատի որպես ՍԴ դատավոր։
«Շատ հեշտ է գնալ մի մարմին եւ այդ մարմնի պրոբլեմների բեռը բարդել մեկ այլ մարմնի վրա։ Իրեն ընտրել են, որ գնա ՍԴ, այնտեղ աշխատի եւ այն ներսից առողջացնի, ինքն ասում է՝ խորհրդարանը ոչինչ չի անում»,-նկատել է Մարուքյանը։ Դիտարկմանը, թե մեկ անձը գուցե ի զորու չէ այդ ամենն իրականացնել, Մարուքյանն արձագանքել է. «Ի զորու չէ, թող չընտրվեր»։
Նա նշել է, որ ժողովրդի ասած «ձրի աշխատավարձ ստացող»-ի բեռը «Իմ քայլը»-ի վրա է։ Մարուքյանը հորդորել է այս խնդրի հետ կապված հարցերը հենց «Իմ քայլը»-ին ուղղել։
«Ովքեր ընտրել են, որոշել են, որ ինչ-որ մեկը ձրի աշխատավարձ ստանա մեր ժողովրդի հաշվին, ընդ որում, ամսական 700 հազար դրամ, նրանք էլ սրա պատասխանատվության կրողներ են»,-նշել է Մարուքյանը։

Աղբյուր` Փաստինֆո