Փաստ ինֆո

ՍԴ դատավոր Վահե Գրիգորյանի՝ աշխատանքից բացակայելու եւ պարտականությունները չկատարելու հանգամանքին համապատասխան իրավական ընթացակարգերով գնահատական պետք է տրվի։ Ըստ Փոստանջյանի, նախ եւ առաջ Սահմանադրական դատարանը պետք է արձանագրի եւ գնահատական տա երեւույթին։

«Միանգամից քրեաիրավական գնահատական տալուն կողմնակից չեմ, բայց  եթե  մարդն ունի պարտականություններ, եթե նա գտնվում է աշխատանքային հարաբերություններում,  դատավոր է, պաշտոնյա է, իհարկե, իր մասնագիտական ու  աշխատանքային պարտականությունները պարտավոր է կատարել։ Անհարգելի բացակայությունը հանգեցնում է իրավական հետեւանքների»,- «Փաստինֆո»-ի հետ զրույցում ասաց «Երկիր Ծիրանի» կուսակցության նախագահ, փաստաբան Զարուհի Փոստանջյանը՝ անդրադառնալով այն հարցին, թե արդյոք մամուլում տեղ գտած  բազմաթիվ հրապարակումներն այն մասին, որ ՍԴ դատավոր Վահե Գրիգորյանը փաստացի չի աշխատում, բայց պետական բյուջեից աշխատավարձ է ստանում, չեն կարող իրավապահ մարմինների համար ուսումնասիրության նյութ հանդիսանալ՝ հաշվի առնելով այն հանգամանքը, որ իրավապահները հայտնել են բազմաթիվ դեպքերի մասին, երբ օրինակ այս կամ այն հաստատությունում անձը գրանցվել է, դիցուք, որպես պահակ, աշխատավարձ է ստացել պետական բյուջեից, բայց փաստացի չի աշխատել՝ դա գնահատելով, որպես պետությանը պատճառված վնաս։

«Եթե կոլեգիալ որոշման  անհրաժեշտություն կա, կամ որեւէ գործ մակագրված է Վահե Գրիգորյանին՝ որպես դատավորի, բայց նա չի կատարել իր պարտականությունները, ապա  դա  նախ պետք է արձանագրվի հենց դատարանի կողմից։ Ես չգիտեմ, նման բան արձանագրվե՞լ է, թե ոչ։  Նախ, պետք է այս հարցին անդրադառնալ, ապա նոր խոսել այն մասին, թե արդյո՞ք դատախազությունը պետք է ընթացք տա»,-ասաց Փոստանջյանը՝ հավելելով, որ պետք է պարզել աշխատանքի չներկայանալու պատճառները, հասկանալ՝ դրանք հարգելի՞ են եղել, թե ՝ ոչ։

Հիշեցնենք, մամուլը բազմիցս է գրել, որ Վահե Գրիգորյանը ՍԴ աշխատանքը բոյկոտում է, թեեւ նա աշխատասենյակ է զբաղեցնում, ունի աշխատակազմ, աշխատավարձ է ստանում, սակայն չի մասնակցում ՍԴ նիստերին, աշխատակարգային որոշումների քննարկմանը, ինչպես նաեւ չի զբաղվում իրեն մակագրված գործերով։

Նկատենք, որ սեպտեմբերի 26-ին Սահմանադրական դատարանի աշխատակազմի ղեկավար Էդգար Ղազարյանը լրատվամիջոցների հարցմանն ի պատասխան, հայտնել էր, որ  Վահե Գրիգորյանը չի մասնակցել ՍԴ որևէ նիստի, այդ թվում՝ 10 դատաքննության, որոնցով  առկա չի եղել մասնակցության անհնարինության հարց։

Ուշագրավ է, որ ՍԴ նախագահ Հրայր Թովմասյանի լիազորությունները դադարեցնելու մասին ԱԺ նախագիծը վարույթ չընդունելու մասին ՍԴ աշխատակարգային որոշման մեջ նշված է անդրադարձ կա «էական կարգապահական խախտում» հասկացությանը, որը հիմք ընդունելով իշխող «Իմ քայլը» խմբակցությունը նախագիծ էր ընդունել եւ դիմել ՍԴ։

 «Սահմանադրական դատարանի մասին» սահմանադրական օրենքի 12-րդ հոդվածով սահմանվում է նաև էական կարգապահական խախտման հասկացությունը։ Ըստ այդմ՝ էական կարգապահական խախտում է` 1) Սահմանադրական դատարանի դատավորի` Սահմանադրական դատարանի նիստերից առանց հարգելի պատճառի մեկ տարվա ընթացքում երեք և ավելի անգամ բացակայելը...»,-նշված է ՍԴ աշխատակարգային որոշման մեջ։

Մեր հարցին, հաշվի առնելով ՍԴ դատավոր Վահե Գրիգորյանի՝ որպես ՍԴ նախագահ ինքնահռչակումը եւ  ՍԴ-ում իր կարծիքով գոյություն ունեցող ճգնաժամի ու այն  հաղթահարելու ուղիների վերաբերյալ հայտնի նամակը արդյո՞ք արդարացված կարելի է համար ՍԴ աշխատանքներին չմասնակցելը, Զարուհի Փոստանջյանը պատասխանեց.«Դատարանները պետք է զերծ լինեն քաղաքականությունից, նրանք իրենց հայացքներում պետք է լինեն բավականին զուսպ եւ դա չցուցադրեն, հիմա, թե ինչից ելնելով Վահե Գրիգորյանը չի մասնակցում ՍԴ աշխատանքներին, պետք է արձանագրվի եւ հրապարակվի, որից հետո նրան պետք է հարց ուղղել, արդյո՞ք քաղաքական դիրքորոշումից ելնելով չի մասնակցել»։

Ինչ վերաբերում է Վահե Գրիգորյանի հայտնի նամակին եւ ՍԴ նախագահ ինքնահռչակմանը՝  Զարուհի Փոստանջյանն ասաց.«կարծում եմ՝ դրա կարիքը չկար, կարծում եմ՝ նա սխալվել է, բայց դա անցել է եւ նա ունի պարտականություններ ։Կարծում եմ նա դա գիտակցում է, Վահե Գրիգորյանը շատ լավ իրավաբան է , հետեւաբար գիտի իր պարտականությունները։ Պատկերացրեք, նա ունի պարտականություններ եւ այդ պարտականությունները, փաստորեն,մնում են չկատարված: Առաջին հերթին ՍԴ աշխատակազմը պետք է դա արձանագրի, գուցե նա գնում է աշխատանքի, բայց չի՞ մասնակցում նիստերին, չի՞ ստորագրում որոշումների տակ»։  

Աղբյուր` Փաստինֆո