Փաստ ինֆո

Փաշինյանն արդեն ամբողջ ուժով գործի է դրել այլևս իր գրպանում հայտնված ողջ իրավական համակարգը, որն էլ իրավունք, Սահմանադրություն, օրենք մի կողմ հլու-հնազանդ, ամբողջովին լծվել է նրա կամքը կատարելուն՝ կոնկրետ դեպքում Հրայր Թովմասյանի վրա այդ թվում հոգեբանորեն ներազդելուն: 

Դեռ չմարսած առավոտյան տարածված ՀՔԾ հայտարարությունը, թե ԱԺ պատգամավոր Արման Բաբաջանյանի կողմից ՀՀ գլխավոր դատախազին ներկայացված հաղորդման հիման վրա հարուցվել է քրեական գործ ՀՀ ՔՕ-ի 300-րդ հոդվածի 1-ին կետով՝ մի խումբ պաշտոնատար անձանց կողմից պետական իշխանությունը յուրացնելու առերևույթ հանցագործության դեպքի կապակցությամբ, որին անմիջապես հաջորդեց Սահմանադրական դատարանում եւ Հայաստանի Հանրապետական կուսակցության գրասենյակում քննչական գործողությունների իրականացումը, հիմա էլ տեղեկություն ստացվեց, թե՝ ԱԱԾ-ն է հոգեբանական գրոհ սկսում Հ. Թովմասյանի ուղղությամբ:

Այսինքն, Փաշինյանը խնդիր է դրել՝ իր զինանոցում եղած ռեպրեսիվ ամբողջ ներուժը գործի դնել՝ մարդկայնորեն, բարոյապես, հոգեբանորեն, որպես հայր և որպես որդի ճնշել ու նեղը գցել Հրայր Թովմասյանին:

Փաստորեն, աստիճանաբար, նախ սանիկների, ապա՝ նրա քույր Անժելա Թովմասյանի վրա տեղի ունեցած հարձակումներին, այդ թվում հիմա էլ վրա-վրա հաջորդում են ավելի սաստիկ ու սոսկալի հոգեբանական հարձակումներ: Այսպիսով Փաշինյանն ըստ էության, հաստատում է բռնարարքների ժամանակի՝ 37 թվի լիակատար և վերջնական վերադարձը: Ժամանակ, երբ ոչ մի օրենք ու իրավունք չէր գործում, գործում էր ժողովուրդների հոր կամքը, որը տեղերում իրականացնող մանկլավիկների ձեռամբ ավելի վայրագ ու քստմնելի դրսևորումներ էր ստանում: Ահավասիկ, այն, որ ԱԱԾ են կանչվել Սահմանադրական դատարանի նախագահ Հրայր Թովմասյանի 75-ամյա թոշակառու հայրը և երկու դուստրերը, ասվածի վկայությունն է:

Ի՞նչ է սա նշանակում: Սա նշանակում է, որ այլևս անկախ դատարանների մասին խոսք լինել չի կարող:

Սա նշանակում է, որ Հայաստանում բոլոր դատարանների դռները կարելի է փակել և դատավորներին տուն ուղարկել:

Քանզի հետայսու որևէ դատավոր չի համարձակվելու օրենքի ուժով որոշում կայացնել:

Քանզի Հայաստանի Հանրապետությունում դատական իշխանությունը ամբողջովին և լիակատար կերպով, ենթակա է, ենթարկվում է մեն -մի մարդու՝ Նիկոլ Փաշինյանին: Ասել է՝ օրենք և իրավունք այսուհետ մեր իրականության մեջ չի կարող լինել, օրենքն էլ, իրավունքն էլ՝ Նիկոլի կամքն է:

Հայաստանի և հայության առջև լրջագույն խնդիր կա ծառացած այսօր, այն է՝ ինչպես ձերբազատվել թավշյա բռնակալ ՝ Նիկոլ Փաշինյանից, որն ուղղակի երկիրը կործանման է տանում:

Հեղինակ` Մարինե Մինասյան