Փաստ ինֆո

Ընդամենը մի քանի ամիս առաջ այս շենքի ղեկավարը, որը Նիկոլ Փաշինյանի գործընկերն էր և նրա կողմից գեներալ-մայորի ուսադիրներ էր ստացել, Նիկոլ Փաշինյանի իշխանության քաղաքական դիագնոզը տվեց՝ ասաց կա՛նգ առ և սթափվի՛ր։ Լրագրողների հետ զրույցում այս մասին ասաց ԱԺ նախկին փոխնախագահ Էդուարդ Շարմազանովը, ով այս պահին ի պաշտպանություն Հրայր Թովմասյանի և նրա ընտանիքի գտնվում է ԱԱԾ շենքի մոտ։ 

«Այս շենքում նստած ղեկավարը, որն ամենաշատ ինֆորմացիան ուներ և եթե այս շենքն ասում է կանգ առ և սթափվիր, ուրեմն մեր երկրում իրավական գործընթացներ այլևս տեղի չեն ունենում։ Այստեղ տեղի է ունենում քաղաքական և անձնական հետապնդում Հրայր Թովմասյանի նկատմամբ»,-ասաց ԱԺ նախկին փոխնախագահը։

Վերջինս ընդգծեց, որ ամեն ինչին չափ կա, այնուամենայնիվ չի զարմանում այս ամենի վրա. «Մի տարի առաջ իմ ընտանիքի վրա էին հարձակվել, մեր վրա էին սև լենտեր արել, իմ երեխայի վրա էին հարձակվել։ Սա նրանց գործելաոճն է, ուրիշ բան չեն էլ կարող անել»,-նշեց Շարմազանովը։

Նա կանխատեսում է, որ Նիկոլ Փաշինյանի ռեժիմը պետք է ուժգնացնի իր հարձակումները, իսկ իրենք դիմակայեն.«Մենք պատրաստ ենք պայքարելու մինչև նրանք կգնան և կգա իսկական ժողովրդավարությունը։ ՀՀ-ում կան տասնյակ հազարավոր քաղաքացիներ, ովքեր չեն հանդուրժելու Նիկոլ Փաշինյանի ռեժիմի կամայականությունները»,-նշեց Շարմազանովը՝ հավելելով, որ ի տարբերություն վարչապետի՝ իրենք իրենց պայքարը կիրականացնեն բոլոր օրինական միջոցներով։

Հեղինակ` Հասմիկ Կոշկարյան