Փաստ ինֆո

Սյունիքի մարզում աղտոտված ջրերի արտահոսքը տեղի է ունեցել Զանգեզուրի պղնձամոլիբդենային կոմբինատից դեպի պոչամբար գնացող խողովակաշարից։ Այս մասին լրագրողների հետ զրույցում ասաց Շրջակա միջավայրի նախարար Էրիկ Գրիգորյանը։

Նրա խոսքով Քաջարանից այդ խողովակաշարը տասնյակ կիլոմետրեր գնում և հասնում է մինչև Արծվանիկի պոչամբար. «Այդ խողովակաշարի վրա միգուցե ինչ-որ ընթացիկ վերանորոգումներ են իրականացվում, բայց գիտենք, որ նման վթարներ պարբերաբար լինում են»,-ասաց Էրիկ Գրիգորյանը։
Վերջինս նկատեց, որ խողովակաշարը կառուցվել է դեռևս խորհրդային տարիներին և չնայած Զանգեզուրի պղնձամոլիբդենային կոմբինատի պարտավորությունն էր վերազինումներ անել, նախարարը պնդում է՝ կոմբինատը տարիներ շարունակ վերազինմանը գումար հատկացնելու փոխարեն ֆիկտիվ տուգանքներ է վճարել։

«Տեսչական մարմինը տեղում է եղել, փորձանմուշներ են վերցրել, առողջապահության տեսչությունը նույնպես այնտեղ է։ Աղտոտման ծավալների և վնասների վերաբերյալ այս մարմիններն իրեցն եզրակացությունը կներկայացնեն»,-ասաց Շրջակա միջավայրի նախարարը։

Հիշեցնենք, որ այսօր կառավարության հերթական նիստի ժամանակ ՀՀ վարչապետ Նիկոլ Փաշինյանը հայտարարեց, որ Սյունիքի մարզում արտակարգ իրավիճակ է ստեղծվել։

«Առավոտից բավականին լուրջ արտակարգ իրավիճակ ունենք Սյունիքի մարզում։ Այնտեղ պոչամբարից աղտոտված ջրերը հոսել են դեպի Ողջի գետ»,-ասաց վարչապետը։

Հեղինակ` Հասմիկ Կոշկարյան