Փաստ ինֆո

Ryanair ավիաընկերության հետ նախկինում չկայացած համագործակցությունը և ներկայումս հաստատված համագործակցությունը պայմանավորված է պետության կողմից սուբսիդիաների խնդրի լուծումով։ Լոուքոսթերներն աշխատում են միմիայն այդ պարագայում, հակառակ դեպքում՝ նրանք պարզապես օգուտ չեն ունենում։ «Փաստինֆո»-ի հետ զրույցում «Հայացք» վերլուծական կենտրոնի փորձագետ, տնտեսագետ Լիլիա Ամիրխանյանն այս կարծիքն արտահայտեց՝ անդրադառնալով Ryanair ավիաընկերության ՀՀ շուկա մտնելու համար կառավարության նախաձեռնած խթանիչ գործոններին։

«Լոուքոսթերների աշխատանքի հիմնական սկզբունքը կայանում է նրանում, որ մի կողմից նրանք որոշակի ուղևորափոխադրման ծառայություններ են մատուցում, մյուս կողմից այն պետությունների կողմից, որոնց հետ համագործակցում են, ստանում են ֆինանսական որոշակի խթաններ։ Դրանք կարող են լինել պետբյուջեից ուղիղ վճարումների տեսքով, կամ հարկային արտոնությունների»,-նշեց տնտեսագետը։

Ըստ էության Քաղավիացիայի կոմիտեն նշել է, որ կան որոշակի հանգամանքներ, որոշակի պայմանավորվածություններ օդի հարկի հետ կապված արտոնությունների տեսքով, բայց տնտեսագետի խոսքով փակագծերը չեն բացվում, թե կոնկրետ ինչ լրացուցիչ ֆինանսական խթանների մասին է խոսում կառավարությունը։

Լիլիա Ամիրխանյանը նկատեց՝ ավիաընկերության հետ նախկինում՝ 2015 թվականին ունեցած բանակցությունների ժամանակ շրջանառվում էր 5 մլն դոլարի ներդրման մասին լուրը, երբ պետության կողմից սուբսիդավորումը պետք է լիներ յուրաքանչյուր ուղևորի համար 76-ից 80 եվրո փոխհատուցման տեսքով. «Այդ ժամանակ համագործակցությունը չստացվեց, որովհետև մեր պետական բյուջեն չուներ այդ հնարավորությունը։ Տվյալ պարագայում լոուքոսթերը Հայաստանում գործունեություն ծավալելու հարմարավետություն չտեսավ»,-ասաց Լիլիա Ամիրխանյանը՝ ընդգծելով, որ այս պահի դրությամբ կառավարությունն ու քաղավիացիայի կոմիտեն ինչ-որ ֆինանսական խթաններ լուծել են, սակայն թե ինչ, մանրամասները հայտնի չեն։

«Սխալ կլինի համեմատել 2015-ի մերժման հիմքերը և 2019-ի հաստատման հիմքերը, որովհետև 2015-ի և 2019-ի բյուջետային հնարավորությունները տարբերվում են։ Հետևաբար գովելի կլինի, եթե քաղավիացիայի կոմիտեն բոլոր պայմանները, ֆինանսական բոլոր խթանիչներն ու հիմնավորումները, որի վրա որոշում է կայացվել, հանրայնացնի»,-նշեց տնտեսագետը, ով առավելապես հակված է, որ համաձայնությունը ձեռք է բերվել հենց պետբյուջեից վճարվող գումարների հաշվին. «Պետք է հասկանանք, արդյոք ձեռք բերված պայմանավորվածությունից քաղաքացիների շահը համարժե՞ք է պետբյուջեից վճարվող գումարներին, թե ոչ։ Ինչպես նաև հասկանալ արդյոք էժան ավիաթռիչքներ իրականացնելով փորձում ենք սոցիալական խնդիր լուծել, թե՞ փորձում ենք բիզնեսին խթանել»,-նշեց Լիլիա Ամիրխանյանը։

Վերջինս պնդում է՝ անկախ քննադատություններից, դեմ և կողմ կարծիքներից, բոլորս էլ շահառուներ ենք և բոլորս էլ օգտվելու ենք, միաժամանակ իրավունք ունենք հասկանալու՝ որքանով են արդարացված վճարումները. «Այդ ներդրումները կատարվում են մեր վճարած հարկերից ձևավորված բյուջեից և հստակ պատկերացում ունենալու համար պետք է հանրայնացնել այդ փաստաթուղթը»,-հավելեց Լիլիա Ամիրխանյանը։

Հեղինակ` Հասմիկ Կոշկարյան