Փաստ ինֆո

ՀՔԾ քննչական խումբը դեռ գտնվում է Մելիք Ադամյան 2 հասցեում գտնվող ՀՀԿ գրասենյակում եւ շարունակում է քննչական գործողությունը։

«Այն, ինչ այսօր առավոտից կատարվում է ՀՀԿ գրասենյակում, ասում եմ կատարվում է, որովհետեւ այս պահին դեռ քննչական խումբը Մելիք Ադամյան 2 հասցեում է, հետեւանքն է դեռ ամիսներ առաջ Նիկոլ Փաշինյանի կողմից ՍԴ-ի վրա կատարված հարձակումների»,-«Փաստինֆո»-ին ասաց ՀՀԿ փոխնախագահ Արմեն Աշոտյանը։

«Փաստինֆո»-ն ավելի վաղ տեղեկացրել է, որ ՀՔԾ քննիչներն այցելել են Հայաստանի հանրապետական կուսակցության գրասենյակ եւ Սահմանադրական դատարան՝ քննչական գործողություններ կատարելու։ Արմեն Աշոտյանի փոխանցմամբ, ՀՔԾ քննիչները ՀՀԿ գրասենյակում են առավոտյան 9-ից։

«Դեռ այստեղ են, չեմ կարող վերջնական ասել, թե ինչ են տարել, քննիչը եւ մի շարք այլ մարդիկ փնտրում են Հրայր Թովմասյանի՝ ՀՀԿ անդամությունը կասեցնելու հիմքերը։ Փնտրելու կարիք չկա, որովհետեւ ի սկզբանե մենք տրամադրել ենք ամբողջ փաստաթղթային փաթեթը եւ Թովմասյանի կուսակցության անդամագրվելու դիմումը եւ անդամությունը կասեցնելու դիմումը, նրա անձնական կուսակցական թերթիկը , այսինքն, պրոցեսը մեզ չի անհանգստացնում իրավական տեսանկյունից, պրոցեսը մեզ անհանգստացնում է քաղաքական տեսանկյունից»,-ընդգծեց Աշոտյանը։

Արմեն Աշոտյանը համոզված է՝ Մելիք Ադամյան 2-ից քննիչները որեւէ խախտում չեն գտնելու.«Որեւէ չեպե հիմք, օրենքի խախտում չեն հայտնաբերելու, Մելիք Ադամյան 2 գրասենյակից որեւէ խախտում դուրս չի եկել, չի եղել այդպիսի բան, բայց քաղաքական տեսանկյունից, մենք ականատես ենք լինում մի անթաքույց սանձարձակ գործընթացի, որի քավորը հենց Նիկոլ Փաշինյանն է, մնացած բոլորը գործիքներ են, ցավոք, գործիքների են վերածվել նաեւ պետական համապատասխան ինստիտուտները՝ դառնալով ռեպրեսիվ ապարատի մաս։ Սա է այսօրվա Հայաստանը»։

Նրա խոսքով, իշխանությունը ամեն կերպ փորձեց եւ փորձում է ՍԴ-ն եւս գրավել, որովհետեւ իշխանազավթումը, սկսվել է դեռ անցյալ տարի.

«Իշխանազավթումը չի սահմանափակվել միայն գործադիր իշխանությամբ, անցյալ տարվա դեկտեմբերի արտահերթ ընտրություններով, հակասահմանադրական ճնշումներով ԱԺ-ի վրա, այլ շարունակվում է ՝ նաեւ դատական համակարգի զավթումը ապահովելու համար՝ բոլոր մակարդակներում։ ՍԴ-ին ամեն կերպ փորձում են կուլ տալ, որովհետեւ որպես ոսկոր մնացել է Նիկոլ Փաշինյանի կոկորդին՝ խանգարելով Հայաստանում վերջնական միապետական կարգերի ձեւավորմանը»։

Աշոտյանի խոսքով, այսօր Հայաստանում իշխանությունը վաղուց չի պատկանում ժողովրդին, այլ նրա անվան տակ իշխանությունը բացառապես պատկանում է Նիկոլ Փաշինյանին։

« Հայաստանում Սահմանադրությունը պահպանելու վերջին միջնաբերդը ՍԴ-ն է եւ Հայր Թովմասյանի անձը, որի հանդեպ ԱԺ-ի հարուցած աղմկահարույց եւ դատարկ գործընթացը ոչնչով չավարտվեց, որի բարեկամների հանդեպ քրեական գործեր են հարուցվում, ՍԴ աշխատակիցների եւ դատավորների գործունեությունը երկար ժամանակ է, ինչ փորձում են խոչընդոտել, ինքնահռչակ ՍԴ ունեինք։ Այս ամենը չաշխատեց, վերջին փրփուրին են դիմել։ Իշխանությունների քաղաքական շահերը սպասարկող, կեղծ ընդդիմադիր, անկախ պատգամավոր Արման Բաբաջանյանի դիմումի հիման վրա ամենազավեշտալի հիմնավորումներով հարուցած քրեական գործն է, այնքան զավեշտալի, որ «Իմ քայլը» խմբակցությունը չկամեցավ անձամբ թաթախվել այդ կեղտոտ ու հիմար գործի մեջ, այլ դա անում են ուրիշի ձեռքերով»,-նշեց Արմեն Աշոտյանը։

 Հ.Գ. Նյութի հրապարակումից հետո Արմեն Աշոտյանը «Փաստինֆո»-ին փոխանցեց, որ ՀՔԾ քննչական խումբը արդեն հեռացել է ՀՀԿ գրասենյակից։

Մանրամասները՝ տեսանյութում

Աղբյուր` Փաստինֆո