Փաստ ինֆո

Կոտայքի մարզի Մրգաշեն համայնքի դպրոցում սովորող երեխաների հոգեւոր անվտանգությունը սպառնալիքի տակ է։ Այս մասին ահազանգում է ծագումով Մրգաշեն համայնքի բնակիչ, պահեստազորի սպա, «Իրավունքի սահման» ՍՊԸ տնօրեն Գեւորգ Հովհաննիսյանը։

«Մտահոգված եմ երեխաների՝ այդ անմեղ էակների հոգեորսության հնարավոր խնդիրներով։ Համայնքի հետ կապս բավականին սերտ է, տեղում ունեմ համակիրներ, որոնք ամեն հարցով ահազանգում են, դիմում են իմ օգնությանը։ «Արդյո՞ք խնդրահարույց չէ, որ կրթական հաստատությունը ղեկավարում է կրոնական այլ ուղղվածություն հարող անձ»,-«Փաստինֆո»-ի հետ զրույցում ասում է Գեւորգ Հովհաննիսյանը։

Նրա խոսքով, հայտնի չէ, թե խոսքն ինչ կրոնական ուղղության մասին է. «Դա փակ խումբ է, ակնհայտ է, թե այնտեղ ինչ կրոնական գաղափարներ են իշխում եւ, եթե չես հարում նրանց կրոնական գաղափարներին, տվյալ կրոնական համայնք մտնելը դառնում է անհնար։ Իհարկե, համապատասխան մարմինների համար ճշտելը բավականին հեշտ կլինի, քանի որ համայնքը փոքր է»։

Նրա խոսքով, բացի այն, որ Մրգաշեն համայնքի դպրոցի տնօրենը այլ կրոնական ուղղության է հարում, տնօրենի ընտրությունն էլ հարցեր է առաջացնում։ Գեւորգ Հովհաննիսյանը պնդում է, որ դպրոցի կառավարման խորհուրդը ձեւավորվել է Կոտայքի մարզպետ Ռոմանոս Պետրոսյանի միջամտությամբ, որն էլ ընտրել է դպրոցի տնօրենին։

«Նրա միջամտությամբ լուծարվել է գործող կառավարման խորհուրդը, քանի որ այնտեղ եղել են իրենց համար անցանկալի անձինք, այնուհետեւ նա կառավարման խորհրդի կազմում է նշանակել է իր հարազատ եղբորը, որը համայնքի բնակիչ չէ եւ տեղյակ չէ համայնքի խնդիրներին, կրթական հաստատության կառավարման փորձ չունի, ուղղակի նշանակվել է որպես մարզպետի եղբայր։ Բացի այդ, կառավարման խորհրդի կազմում վերջինս ընդգրկել է իր ընկերոջը, նա զբաղեցնում է կառավարման խորհրդի նախագահի պաշտոնը»,-ասաց մեր զրուցակիցը։

Նրա խոսքով, կառավարման խորհրդի կազմի փոփոխության նպատակն է եղել դպրոցի տնօրեն դարձնել Կոտայքի մարզպետի եղբոր ընկերոջ՝ դպրոցի կառավարման խորհրդի նախագահի մորը։

«Ստացվում է այսպես՝ Կոտայքի մարզպետի պաշտոնն զբաղեցնող անձը կառավարման խորհրդում է խցկել իր եղբորը, որոշակի մեխանիզմներով մարզպետի եղբոր ընկերը նշանակվել է կառավարման խորհրդի նախագահ եւ արդյունքում, կառավարման խորհրդում ունենալով իրենց համար անհրաժեշտ թիմային ձայներ, ընտրել են իրենց համար ձեռնտու թեկնածուի, որը կառավարման խորհրդի նախագահի մայրն է»։

Գեւորգ Հովհաննիսյանն ասում է՝ որպես իրավապաշտպան կազմակերպության ղեկավար, առնվազն մտահոգված է պետական իշխանությունների հեղինակության համար, որը անկում է գրանցում. «Դասական իրավունքի տեսանկյունից, այն անձը, որը անձնական կամ այլ կախվածության մեջ է գտնվում այն անձի հետ, ում պետք է քվե տա, բնականաբար կաշկանդված է լինելու եւ արդարացի ընտրություն չի լինելու։ Տղայի կողմից մոր ընտրությունը իրավաչափության առումով արժանի է գնահատման, գնահատման արժանի է այն, որ մարզպետը, օգտագործելով իր լծակները, իր եղբորն է խցել կառավարման խորհրդի կազմում։։ Այս ամենը ձեւավորում է խմբային շահերից ելնելով պետական իշխանությունն օգտագործելու առերեւույթ հատկանիշներ, ինչը նաեւ քրեաիրավական որակման է արժանի՝ արդյոք կա՞ն հանցագործության հատկանիշներ, թե ՝ ոչ»։

Այս ամենի հիման վրա հաղորդում է ներկայացվել Գլխավոր դատախազություն ԱԱԾ եւ Ոստիկանություն։ Գեւորգ Հովհաննիսյանի խոսքով, որեւէ արձագանք առայսօր չի ստացվել։

Դիմում է ուղարկվել նաեւ ՄԻՊ գրասենյակ, որտեղ ահազանգել են Մրգաշեն համայնքի դպրոցում հոգեորսության հնարավոր վտանգների մասին կրոնական ։ Դիմել են նաեւ ԿԳՄՍ նախարարությանն ու տարածքային կառավարման նախարարություններին՝ հրապարակել դպրոցի կառավարման խորհրդի անդամների կրոնական ու քաղաքական պատկանելությունը։

Գեւորգ Հովհաննիսյանի խոսքով, կառավարման խորհրդի անդամների մեծ մասը իշխող քաղաքական ուժի ներկայացուցիչ են այն դեպքում, երբ բազմիցս իշխանությունները հնչեցրել են կրթական հաստատություններն ապաքաղաքական դարձնելու անհրաժեշտության մասին։

«Դպրոցի աշակերտների ծնողներն ու համայնքը իրավունք ունեն իմանալու, թե իրենց երեխաների կրթությամբ ու դաստիարակությամբ զբաղվող անձինք ինչ կրոնական եւ քաղաքական պատկանելություն ունեն։ Կեսկատակ կեսլուրջ ծնողները ասում են, թե ամեն դասից առաջ պետք է ինչ-որ հոգեւոր արարողություն լինի, նոր երեխաներն անցնեն դասի։ Ի՞նչն է խոչընդոտում մարզպետարանին հրապարակել այդ տեղեկությունները»,-ասում է Գեւորգ Հովհաննիսյանը։

Աղբյուր` Փաստինֆո