Փաստ ինֆո

Փաստաբան Նորայր Նորիկյանի խոսքով, խիստ մտահոգիչ է այն, որ հանրային կյանքում ոստիկանի կերպարի կամ ոստիկանության ընկալման խնդիր կա։ Փաստաբանը նաեւ այս խնդրի համատեքստում է դիտարկում լուսադեմին տեղի ունեցած դեպքը՝ ծառայությունն իրականացնելիս ոստիկանի սպանությունը։
«Տեղի է ունեցել քստմնելի հանցագործություն եւ իրավասու մարմինները պարտավոր են բացահայտել հանցագործությունը եւ պատժել մեղավորներին ՝ օրենքի ողջ խստությամբ»,-ասաց փաստաբանը։

Նրա խոսքով, հանրային կյանքից պետք է դուրս մղվի «մլիցու» «գործ սարքելու» եւ ընդհանրապես, ոչ իրավաչափ գործողություրններ իրականացնողի ընկալում ունեցող ոստիկանության կերպարը։ Ըստ նրա, պետք է սերմանել այն մտայնությունը, որ ոստիկանությունը դա նույն հասարակությունն է եւ փոխադարձ վստահության վրա հիմնված համագործակցության արդյունքում կունենանք այն ոստիկանությունը, որը իրապես պետք է ծառայի հանրությանը։

«Ես այդպիսի ոստիկանության ձեւավորման տեսլական ունեմ, իսկ այս կոնկրետ դեպքը գալիս վկայելու, որ վստահության դեֆիցիտ կա ոստիկանություն-հասարակություն, ոստիկանություն-քաղաքացի հարաբերություններում։ Ես գտնում եմ, որ մեզ որակապես նոր ոստիկանություն է պետք, մենք պետք է ձեւավորենք եւ ունենանք այնպիսի ոստիկանություն, որ մեր ոստիկանության նկատմամբ տոտալ հասարակական հարգանք առկա լինի»,-նշեց փաստաբանը՝ հավելելով, որ ոստիկանները հավանաբար փորձել են մոտենալ,անձանց ինքնությունը պարզել եւ արդյունքում տեղի է ունեցել այս ողբերգությունը։

«Ինչո՞ւ պետք է երիտասարդ ոստիկանը տնից դուրս գա աշխատանքի եւ չվերադառնա, մենք ի՞նչ պետք է անենք, որ այս անվստահության մթնոլորտը վերանա»,-նշեց փաստաբանը։

«Փաստինֆո»-ի դիտարկմանը, թե նախորդ տարվա ապրիլ-մայիսյան իրադարձություններից հետո հայտարարվեց, թե «ոստիկանը մերն է» ՝ ժողովրդինը, արդյո՞ք այդ ընկալումը չի փոխվել, Նորայր Նորիկյանը պատասխանեց.«Խոսքը էմոցիոնալ գնահատականների մասին չէ, ես գտնում եմ, որ ոստիկանություն-հասարակություն կոնտեքստում ահռելի աշխատանք կա անելու եւ ՀՀ իրավասու մարմինները պարտավոր են այնպիսի արմատական բարեփոխումներ իրականացնել, որ մենք կարողնանք ձեւավորել այնպիսի ոստիկանություն, որը կվայելի հասարակության հարգանքն ու վստահությունը եւ կառաջնորդվի բացառապես ՀՀ օրենսդրությամբ»։

Դիտարկմանը, արդյո՞ք այդ անվստահության մթնոլորտի խորացման հարցում դերակատարություն չունեցան նաեւ 2016 թ հուլիսյան իրադարձությունները, երբ «Սասնա ծռեր»-ը զինված հարձակում գործեցին ու գրավեցին ՊՊԾ գունդը, ինչի հետեւանքով 3 ոստիկան սպանվեց եւ շատերը մինչեւ այսօր արդարացնում են այդ գործողությունը, Նորայր Նորիկյանը արձագանքեց, թե չի ցանկանում դետալացնել երեւույթները։

Ըստ նրա, յուրաքանչյուր անձ, ով իրականացնում է ՀՀ քրեական օրենսդրությամբ արգելված արարք, ենթակա է պատասխանատվության օրենքի ողջ խստությամբ՝ անկախ շարժառիթից, իր կողմից ներկայացված պատճառաբանություններից ու արդարացումներից։ «Եթե նա կատարել է հակաիրավական գործունեություն, որը չի բխում ՀՀ օրենսդրությունից, ավելին, խախտում է այդ օրենքը, որի արդյունքում ծանր հետեւանքներ են առաջանում, այդտեղ երկրորդ կարծիք լինել չի կարող, որեւէ հանցագործություն չի կարող արդարացվել։ Օրինականության դեմ պայքարը չի կարող արդարացվել ապօրինությամբ»,-եզրափակեց Նորայր Նորիկյանը։

Նշենք, որ ոստիկանության ավագի սպանության վերաբերյալ ՀՀ ոստիկանապետի ԺՊ Արման Սարգսյանը հայտարարել է, որ ոստիկանի վրա ձեռք բարձրացնելը հավասարազոր է պետության վրա ձեռք։

Այս դեպքին արձագանքել են նաեւ «Սասնա ծռեր»-ը։ Մասնավորապես, համանուն կուսակցության քաղխորհրդի անդամ Վարուժան Ավետիսյանն ասել է, թե ցնցված է ոստիկանների նկատմամբ այդ դաժան գործողությունից, թեեւ վերջինս եւս մեղադրվում է զինված խմբի կազմում ՊՊԾ գունդը զավթելու մեջ։

Աղբյուր` Փաստինֆո