Փաստ ինֆո

«Փաստինֆո»-ի փոխանցմամբ  Երևանի ընդհանուր իրավասության դատարանի Կենտրոնի նստավայրում քիչ առաջ մեկնարկեց «5-րդ ալիք»-ի սեփականատեր Արմեն Թավադյանի և քաղաքացիական ակտիվիստ Վարդգես Գասպարիի գործով դատական նիստը։ Այն նախագահում է դատավոր Կարեն Ֆարխոյանը։

Նշենք, որ Արմեն Թավադյանը սույն գործով ունի մեղադրյալի կարգավիճակ։ Նրա պաշտպանն է Հովհաննես Խուդոյանը։ Վարդգես Գասպարին ունի տուժողի կարգավիճակ։ Նրա ներկայացուցիչն է Տիգրան Եգորյանը։ Գործով մեղադրող դատախազն է Մարտին Արզումանյանը։

Նիստի մեկնարկին դատավորը հայտնեց, որ պաշտպան Հովհաննես Խուդոյանից ստացվել է գրություն այն մասին, որ նա այսօրվա նիստին չի կարող ներկայանալ նախապես նշանակված այլ դատական նիստի պատճառով։ Պաշտպանը դիմել է դատարան` նիստը հետաձգելու և հոկտեմբերի 21-ից հետո նշանակելու համար։

Պաշտպանի դիմումի վերաբերյալ իր առարկությունը ներկայացրեց տուժող կողմը` խնդրելով դատարանին բացակայությունը համարել անհարգելի. «Պաշտպանի նշած տեղեկությունը մասնակի է համապատասխանում իրականությանը. ես էլ այդ նախապես նշանակված դատական նիստին այսօր որպես տուժողի իրավահաջորդի ներկայացուցիչ մասնակցել եմ։ Ապա այն հետաձգվել է։ Ուստի այս պահին այդ նիստով պայմանավորված ոչ ոք չի կարող պատճառաբանել դատարան չներկայանալը։ Ինչ վերաբերում է Արմեն Թավադյանին, ապա ինքը նշված նիստով (Քոչարյանի եւ մյուսների) որեւէ մասնակցություն չունի, նրա մասնակցությունն այդ նիստով ընդամենը, այսպես ասած, երկրպագուների խմբի մասնկացության կարգավիճակն է՝ ի պաշտպանություն Քոչարյանի»,-նշեց Եգորյանը` հավելելով, որ այդ հիմքով բացակայությունը չի կարող հարգելի համարվել։

Մեղադրող դատախազ Մարտին Արզումանյանը ևս նշեց, որ բացակայությունը հարգելի չէ և միջնորդեց բերման ենթարկել Արմեն Թավադյանին։

Լսելով կողմերին` դատարանը որոշեց նրանց ևս մեկ անգամ ծանուցել և հետաձգել այսօրվա նիստը։ Այն կկայանա նոյեմբերի 13-ին` ժ.15:00-ին։

Հիշեցնենք, որ հեռուստաընկերության սեփականատիրոջը մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով (խուլիգանություն, որը կատարվել է զենքի կամ որպես զենք օգտագործվող առարկայի գործադրմամբ): Նրա նկատմամբ որպես խափանման միջոց է ընտրվել ստորագրություն չհեռանալու մասին։

Ա.Թավադյանին մեղսագրվող միջադեպը տեղի է ունեցել Երեւանի ընդհանուր իրավասության դատարանում ՀՀ երկրորդ նախագահ Ռոբերտ Քոչարյանի նկատմամբ խափանման միջոցի հարցի քննարկման ժամանակ՝ 2019թ․ մայիսի 13-ին։

Ավելի վաղ հայտնել ենք, որ կալանավորման հիմնավոր լինել-չլինելու վերաբերյալ նիստի ընթացքում, Վարդգես Գասպարին բողոքի ակցիա էր իրականացրել դատարանի դիմաց՝ «Ռոբիկ սրիկա, Ռոբիկ մարդասպան» պաստառով։ Քոչարյանի աջակիցները նրա ձեռքից խլել եւ պատռել էին պաստառը, առաջացած քաշքշոցի ժամանակ նաեւ ջրով լի շշով հարվածել էին նրա դեմքին: Դեպքի առթիվ Քննչական կոմիտեն հարուցել էր քրեական գործ, Գասպարին ճանաչվել էր տուժող, եւ նույն օրը Արմեն Թավադյանին մեղադրանք էր առաջադրվել ։

Նախաքննական մարմինը միջնորդություն էր ներկայացրել նաեւ հեռուստաընկերության սեփականատիրոջ նկատմամբ որպես խափանման միջոց կալանավորումն ընտրելու մասին, ինչը դատարանը մերժել էր։

Հեղինակ` Միլենա Խաչիկյան