Փաստ ինֆո

Երևանի ընդհանուր իրավասության դատարանի դատավոր Աննա Դանիբեկյանին ուղիղ եթերում «վնգստացող դատավորների» մասին հարցեր ուղղած երիտասարդներ Նարեկ Մութաֆյանին և Սարգիս Օհանջանյանին կալանավորելու վերաբերյալ որոշումը բողոքարկվել է։ «Փաստինֆո»-ն այս մասին տեղեկացավ փաստաբան Վահե Եփրիկյանից։

Վերջինիս խոսքով հոկտեմբերի 3-ին բողոքներն ուղարկել են Վերաքննիչ դատարան, սակայն մինչ այսօր որևէ տեղեկություն չունեին. «Հատկանշական է այն, որ առաջին ատյանի դատարանի համար սահմանվում է անհապաղ ժամկետ՝ գործերն ուղարկելու Վերաքննիչ դատարան, սակայն այս դեպքում անհապաղությունն ավելի քան 10 օր տևեց»,-ասաց Վահե Եփրիկյանը՝ նշելով, որ այսօր առավոտյան է Շենգավիթի դատարանից տեղեկացել, որ գործերն ուղարկվել են Վերաքննիչ դատարան։

«Ունենալու ենք մի իրավիճակ, որ անձը շուրջ մեկ ամիս գտնվում է կալանքի տակ և իր պաշտպանության իրավունքն, ըստ էության պատշաճ կարգով չի իրականացվում, որովհետև դատարաններն ուղղակի տեխնիկապես ձգձգում են այդ դատական նիստը»,-ասաց Վահե Եփրիկյանը։
Հիշեցնենք, որ սեպտեբերի 27-ի գիշերը երկու երիտասարդ ՝Նարեկ Մութաֆյանը և Սարգիս Օհանջանյանը, դատավոր Աննա Դանիբեկյանին զուգահեռ քայլելով նկարել և հարցրել են, թե արդյոք նա համարում է իրեն «դռների տակ վնգստացող դատավոր», ինչպես դատական իշխանության մասին խոսելիս արտահայտվել էր ՀՀ վարչապետ Նիկոլ Փաշինյանը։

Դեպքի առթիվ հարուցվել է քրեական գործ եւ ՀՀ Քննչական կոմիտեի ԵՔՔՎ Շենգավիթ վարչական շրջանների քննչական բաժնում քննվող քրեական գործով նշված երիտասարդներին մեղադրանք է առաջադրվել՝ ՀՀ քրեական օրենսգրքի 332-րդ հոդվածի 1-րդ մասի հատկանիշներով՝ արդարադատության իրականացմանը խոչընդոտելու համար։ Նրանց նկատմամբ որպես խափանման միջոց է ընտրվել կալանավորումը։

Աղբյուր` Փաստինֆո