Փաստ ինֆո

ԱԺ «Իմ քայլը» խմբակցության պատգամավոր Անդրանիկ Քոչարյանի հայտարարության հարցով ԱԺ էթիկայի հանձնաժողով ստեղծել-չստեղծելու հարցի շուրջ քննարկման մասին որեւէ տեղեկություն առաջարկության հեղինակ իրավապաշտպանները չունեն։

Այս մասին «Փաստինֆո»-ին ասաց «Իրավական ուղի» ՀԿ համահիմնադիր Սիրանուշ Սահակյանը։

«Հարցն իրենց ուշադրությանն արժանանալուց հետո արդեն ԱԺ կանոնակարգ օրենքին համապատասխան պետք է գործեին։ Կարծում եմ՝ ողջամիտ ժամկետ է, որ հասկանանք քայլերը։ Մենք ակնկալում ենք խմբակցության կամ անգործությունը կամ գործողությունը։ Դրանցից յուրաքանչյուրը հանգեցնելու է հետեւությունների։ Իսկ թե որքանով իրենք նախաձեռնող կլինեն, կցանկանան էթիկական ստանդարտներ զարգացնել, թե իրենց անգործությամբ կնպաստեն քաղաքական մշակույթի վաթտարացմանը, արդեն կտեսնենք իրենց գործունեությունից»,-մեզ հետ զրույցում ասաց Սիրանուշ Սահակյանը՝ շեշտելով, որ Անդրանիկ Քոչարյանի արձագանքը տվյալ դիմումին սուբյեկտիվ է եղել, նա անձնավորել ու թիրախավորել է դիմումի հեղինակներին։

«ՀՀ-ում որեւէ քաղաքացի , առավել եւս ՀԿ , եթե հաղորդում ներկայացնի հանցագործության մասին, չի կարող հիմք հանդիսանալ, որ դատախազությունն իրեն վիրավորված զգա եւ սկսի թիրախավորել հաղորդում ներկայացնող անձանց։ Սա արդեն իսկ հետեւությունների տեղիք է տալիս»,-շեշտեց Սիրանուշ Սահակյանը։

Հիշեցնենք, «Իրավական ուղի» հասարակական կազմակերպության համահիմնադիր, փաստաբան Սիրանուշ Սահակյանը, փաստաբան Լուսինե Սահակյանը և «Այլընտրանքային նախագծեր» խմբի անդամ, փաստաբան Էլինար Վարդանյանը նամակով դիմել էին ՀՀ Ազգային ժողովում ներկայացված երեք խմբակցություններին՝ ԱԺ էթիկայի ժամանակավոր հանձնաժողով ստեղծելու նախաձեռնությամբ հանդես գալու խնդրանքով։ Դիմումի հիմքն է հոկտեմբերի 2-ին պատգամավոր Ա.Քոչարյանի հնչեցրած՝ էթիկայի կանոններին հակասող արտահայտությունը։

«Փաստինֆո»-ն ավելի վաղ տեղեկացրել էր, որ ԱԺ «Իմ քայլը» խմբակցության պատգամավոր Անդրանիկ Քոչարյանը հոկտեմբերի 2-ին 1in.am լրատվականին տված հարցազրույցում, անդրադառնալով ՀՀ արդարադատության նախկին նախարար Արփինե Հովհաննիսյանի կողմից իր հասցեին հնչեցված քննադատությանը, հայտարարել է․ «Տիկինը ինչ-որ պահի հանդիսացել է մեր երկրի արդարադատության նախարարը։ Պետք է խոսի փաստերով, իսկ պայմանական կարող է տալ իր մայրիկի, իր անհայտ հայրիկի և մյուսների անունները․․․» Այս հայտարարությունը հարուցել էր հասարակական-քաղաքական շրջանակների զայրույթն ու քննադատությունը։

Անդրանիկ Քոչարյանը ներողություն չէր խնդրել հայտարարության համար, իսկ իրավապաշտպան կանանց դիմումի վերաբերյալ Ֆեյսբուքում գրել էր .

«Սերժ Սարգսյանի նախկին ռեֆերենտ Սիրանուշ Սահակյանի Էթիկայի հանձնաժողովի նախագահի պաշտոնավարության ընթացքում տապալվեցին քաղաքացիական հասարակության կողմից նախաձեռնած բոլոր վարույթները, իսկ Էլինար Վարդանյանը, իբրև Ազգային Ժողովի մարդու իրավունքների պաշտպանության հանձնաժողովի նախագահ, կատարյալ անգործություն դրսևորեց ՀՀ-ում առկա մարդու իրավունքների աղաղակող խախտումներին։ Իրավապաշտպան գործունեությամբ պետք է զբաղվեն անբասիր անցյալ ունեցող, հայերենին լավ տիրապետող, խոսքը չաղավաղող և բարեվարքության պակաս չունեցող անձինք»:

«Կարծում եմ՝ իմ պատասխանին ծանոթ եք։ Այնտեղ ոչ թե ես եմ գնահատական տվել իմ գլխավորած հանձնաժողովի գործունեությանը , այլ բառացիորեն մեջբերել եմ միջազգային հեղինակավոր կառույցների գնահատականը հանձնաժողովի եւ իմ գործունեությանը։ Այստեղ մնում է հասկանալ, թե նմանատիպ միասնական փորձագիտական դիրքորոշումների պայմաններում ինչու են թիրախավորվում այն անձինք, ովքեր արդարացի խնդիրներ են բարձրացնում»,-նշեց Սիրանուշ Սահակյանը՝ շեշտելով, որ ԱԺ էթիկայի հանձնաժողով ստեղծելու եւ Անդրանիկ Քոչարյանի հայտարարության հարցը քննելու պահանջը բխում է պետության շահերից։

«Մենք մեր քայլը կատարել ենք, մնացյալը իրենց տիրույթում է։Մենք դիմել ենք, որ իրենք նախաձեռնեն ԱԺ ժամանակավոր էթիկայի հանձնաժողով։ Եթե քննարկման ընթացքում կգնեն որ խախտում կա, գնահատական կտան իրենց պատգամավորի գործողություններին, եթե կգտնեն, որ այդտեղ խախտում չկա, դրանով ազդակ կներկայացնեն հասարակության ներկայացուցիչներին ու քաղաքական ուժերին, որ քաղաքական գործիչներին քննադատելիս, նմանատիպ արտահայտությունները դառնում են ընդունելի գործելաոճ մեր մշակույթում, իսկ այս քայլը անձնավորելը խոսում է այն մասին, թե ինչ մշակույթ կրող քաղաքական դաշտի հետ գործ ունենք»։

Սիրանուշ Սահակյանը նաեւ նշեց, որ պաշտոնական գրագրության մեջ ընդունված է հետադարձ պատասխանը, բայց տվյալ դեպքում իրենց համար ոչ այնքան կարեւոր է ֆորմալ գրություն ունենալ խմբակցություններից, որքան այդ նախաձեռնության քննարկման արդյունքում գործողությունները ՝ նախաձեռնել, ստեղծել ժամանակավոր հանձնաժողով կամ անտեսել։

Նշենք, որ ԱԺ Կանոնակարգ օրենքի համաձայն, ժամանակավոր հանձնաժողովը ստեղծվում է Ազգային ժողովի որոշմամբ, որի նախագիծը ներկայացնելու իրավունքն ունի խմբակցությունը: Ժամանակավոր հանձնաժողով ստեղծելու մասին Ազգային ժողովի որոշմամբ սահմանվում են հանձնաժողովի անվանումը, գործունեության ժամկետը, ինչպես նաև նրա իրավասությանը վերապահված նախագծի կամ պատգամավորական էթիկային առնչվող հարցի վերաբերյալ եզրակացությունների ներկայացման ժամկետները։

Պատգամավորական էթիկայի հարցով ժամանակավոր հանձնաժողովի գործունեության ժամկետը մինչև երկու ամիս է, որը կարող է հարցի քննարկումն ավարտելու նպատակով մինչև մեկ ամսով երկարաձգվել հանձնաժողովի առաջարկությամբ՝ Ազգային ժողովի որոշմամբ:

Աղբյուր` Փաստինֆո