Փաստ ինֆո

«Մենք այլեւս չպետք է զարմանանք, որ այն գործիչների նկատմամբ, ովքեր պայքարում են այսօրվա ռեժիմի դեմ՝ լինի ՍԴ նախագահ, դատավոր, քաղաքական գործիչ, թե նախկին նախագահ, քաղաքական բռնաճնշումներ են լինում, ավելին՝ իրավական կատեգորիաներն այլեւս կապ չունեն այս ամենի հետ», -«Փաստինֆո»-ի հետ զրույցում ասաց ԱԺ նախկին փոխնախագահ, ՀՀԿ խոսնակ Էդուարդ Շարմազանովը՝ անդրադառնալով ՀՀ գլխավոր դատախազության հանձնարարականին՝ ստուգել ՍԴ նախագահ Հրայր Թովմասյանի ունեցվածքի թերի հայտարարագրման վերաբերյալ մամուլի հրապարակումները։

Հիշեցնենք, տեղեկությունը «Փաստինֆո»-ի հետ զրույցում հաստատել էր ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանը։

Շարմազանովի խոսքով, այն պահից, երբ ՀՀ 2-րդ նախագահ Ռոբերտ Քոչարյանի դիմումի հիման վրա կայացված ՍԴ որոշումը չկատարվեց եւ Ռոբերտ Քոչարյանն ազատ չարձակվեց, ակնհայտ դարձավ, որ Հայաստանում իրավունքն ու օրենքը չեն գործում։

«ՍԴ-ի որոշումներն իմպերատիվ են բոլոր դատարանների համար։ Ակնհայտ է մեկ բան՝ այս 1.5 տարվա ընթացքում նրանք, ովքեր չեն ծառայել Նիկոլ Փաշինյանի ռեժիմին, հայտնվել են իրավապահների թիրախում։ Թող նայեն Հրայր Թովմասյանի գույքը եւ Նիկոլ Փաշինյանին սպասարկող թիմակիցների, պատգամավորների, կեղծ ընդդիմադիրների կամ նույն իրավապահ համակարգում նրա պատվերն ու հրահանգները կատարողների գույքը՝ թե ՀՔԾ-ում, թե դատախազությունում։ Երբ Հրայր Թովմասյանը որոշեց պաշտպանել Սահմանադրությունը, նրա գույքի մասին հիշեցի՞ն։ Ծիծաղելի է, տղաներ»,-ասաց Շարմազանովը։

Ուշագրավ է, որ ՍԴ-ն Սահմանադրական դատարանն այսօր աշխատակարգային նիստ է գումարել, որի ընթացքում որոշվելու է ՍԴ նախագահ Հրայր Թովմասյանի լիազորությունները դադարեցնելու հարցով Ազգային ժողովի դիմումը վարույթ ընդունել-չընդունելու հարցը, իսկ
Հրայր Թովմասյանը երկօրյա արձակուրդ է վերցրել իր լիազորությունները դադարեցնելու վերաբերյալ ԱԺ նախագիծը քննող ՍԴ նիստին չմիջամտելու համար: Մեր հարցին, արդյո՞ք այս հանգամանքի ու գլխավոր դատախազության որոշման մեջ կարող ենք կապ տեսնել, Շարմազանովն պատասխանեց, որ զարմանալի չի համարում նույնիսկ այն, որ գուցե օրերից մի օր Հրայր Թովմասյանին կամ գործող իշխանության կամքը չկատարող մեկ ուրիշին, կամ նրանց, ովքեր պայքարում են գործող ռեժիմի դեմ, ոչ միայն գույքից զրկեն, այլեւ ազատազրկեն՝ ցանկացած հոդվածով։

«Եթե նախկին նախագահին, Արցախի հերոսին կարող են առանց պատճառի անազատության մեջ պահել՝ հաշվի չառնելով ՍԴ որոշում, էլ ինչի՞ վրա եք զարմանում։ Այս երկրում չկա իրավական իշխանություն, մեր երկրում օրենքը չի գործում, Նիկոլ Փաշինյանն իր կամքը օրենքից վեր է դասում, բայց մի բան եմ ասում՝ տղաներ, բոլորդ օրենքի առջեւ պատասխան եք տալու։ Բոլոր ռեժիմները մի օր քանդելու են, բոլոր նրանք, ովքեր նպաստել են այս ապօրինություններին, ըստ օրենքի պատասխան են տալու»,-ասաց ԱԺ նախկին փոխնախագահը։

Աղբյուր` Փաստինֆո