Փաստ ինֆո

Քրեական աշխարհում հայտնի Արտյոմ Կանևսկոյը՝ Արտյոմ Հարությունովը չի ընդունում իրեն առաջադրված մեղադրանքը եւ պնդում, թե տեղյակ չէ, թե ինչպես է խուզարկությամբ իր ավտոմեքենայում հայտնաբերված հրազենն այնտեղ հայտնվել։ Ավելին՝ նա հայտարարել է, թե տեղյակ չի եղել, որ իր մեքենայում հրազեն կա: 

Նշենք, որ գործն արդեն հինգ ամիս է, ինչ դատարանում է և օրերս կայացած դատական նիստում հարցաքննվել է վարույթն իրականացնող մարմնի կողմից դատակոչված միակ վկան։

«Փաստինֆո»-ի թղթակցի հետ զրույցում Արտյոմ Հարությունովի պաշտպան Հովսեփ Սարգսյանը նշեց, որ իր պաշտպանյալի ավտոմեքենայում ապօրինի խուզարկություն է կատարվել՝ առանց դատարանի թույլտվության: Ինչ վերաբերում է դատարանում հարցաքննված վկա Մյասնիկ Մատինյանին, ապա պաշտպանի խոսքով՝ վկան հայտնել է, որ Հարությունովի ավտոմեքենայում հայտնաբերված զենքը իր անունով է հաշվառված՝ զինվորական է, Արտյոմի հետ հաճախակի են որսի գնացել, այդ օրը ևս ցանկացել է որսի գնալ ընկերոջ հետ և իմանալով, որ Արտյոմը գտնվել է մարզասրահում, գնացել է այնտեղ: Մինչ ընկերը կավարտեր մարզումը՝ զենքը մոտը չպահելու համար այն դրել է Արտյոմի ավտոմեքենայի մեջ։ Վկան պնդում է, թե ինքն է ավտոմեքենայի բանալին վերցրել՝ առանց ասելու, թե ինչի համար։

Սակայն աշխատավայրից իրեն կանչել են, ուստի շտապել է գնալ՝ մոռանալով անգամ զգուշացնել, որ իր զենքը դրել է Արտյոմի մեքենայի մեջ, իսկ հաջորդ օրը լրատվամիջոցներից տեղեկացել է, որ Արտյոմին բերման են ենթարկել հենց այդ զենքի պատճառով:

Հայտնի է նաև, որ օրինական զենքն այլ վայրում թողնելու համար վկան վարչական տուգանքի է ենթարկվել: Պաշտպանը նշում է, երբ Արտյոմը մարզասրահից դուրս է եկել, նրան պառկեցրել են գետնին, ապա ուժի գործադրմամբ բերման ենթարկել, իսկ ավտոմեքենան տեղափոխել են 6-րդ վարչության շենքի բակ, և ապօրինի՝ առանց դատարանի թույլտվության խուզարկել, սակայն քրեական գործում հիշյալ գործողությունը ձևակերպվել է որպես մեքենայի զննություն: Արտյոմ Հարությունովը հայտնել է, որ դա իր զենքը չի եղել, նույնիսկ տեղյակ չի եղել, որ իր ավտոմեքենյում զենք կա: Հովսեփ Սարգսյանը նաև նշեց, որ իր պաշտպանյալը դատարանում դեռևս ցուցմունք չի տվել, հայտնել է, որ այս պահին չի ցանկանում ցուցմունք տալ:

Նշենք, որ պաշտպան Սարգսյանը միջնորդել է որպես լրացուցիչ վկաներ հրավիրել և հարցաքննել Հարությունովի հետ մարզասրահում գտնված 6 անձանց, վերջիններիս վարույթն իրականացնող մարմինը չի դատակոչել, թեև Հարությունովին բերման ենթարկելու ժամանակ նրանց ևս բերման են ենթարկել: Նոյեմբերի 11-ին կայանալիք նիստում՝ դատարանը կհարցաքննի պաշտպանի միջնորդությամբ հրավիրված վկաներին:

Ըստ մեղադրանքի՝ քրեական հեղինակություն համարվող Կանեւսկոյը իր կողմից օգտագործվող «Տոյոտա» մակնիշի ավտոմեքենայի մեջ ապօրինի պահել է Մյասնիկ Մատինյանի անվամբ հաշվառված, կրակոցներ կատարելու համար պիտանի, ակոսափող հրազեն հանդիսացող որսորդական ինքնալից կարաբին իր պահեստատուփով լիցավորված կրակելու համար պիտանի որսորդական ակոսափող զենքերի համար նախատեսված ռազմամթերք հանդիսացող թվով 30 հատ գործարանային արտադրության փամփուշտներ և մեկ հատ պահեստատուփ լիցքավորված կրակելու համար պիտանի որսորդական ակոսափող զենքերի համար նախատեսված ռազմամթերք հանդիսացող թվով 20 հատ գործարանային արտադրության փամփուշտներ, որոնք հայտնաբերվել են Արտյոմ Հարությունովի նշված ավտոմեքենայի զննությամբ։ Վերջինիս մեղադրանք է առաջադրվել ՀՀ քրեական օրենսգրքի 235 –րդ հոդվածի 1-ին մասով, և նրա նկատմամբ որպես խափանման միջոց է ընտրվել չհեռանալու մասին ստորագրությունը:

Հեղինակ` էլեն Առաքելյան