Փաստ ինֆո

Արցախի ԱԱԽ նախկին քարտուղար, գեներալ-մայոր Վիտալի Բալասանյանի՝ Livenews.am-ին տված հարցազրույցում տեղ գտած հայտարարությունների կապակցությամբ Ազգային անվտանգության ծառայությունում այս պահին քրեական գործ հարուցված չէ։

«Փաստինֆո»-ի հարցմանն ի պատասխան ԱԱԾ մամուլի կենտրոնից հայտնեցին, որ ՀՀ գլխավոր դատախազությունից ստացված գրությունը փոխանցվել է ԱԱԾ քննչական դեպարտամենտ։ «Նյութերը ստուգման փուլում են։ Արդյունքների մասին այս պահին ոչինչ ասել չենք կարող»,- «Փաստինֆո»-ին փոխանցեցին ԱԱԾ մամուլի կենտրոնից։

Հիշեցնենք, որ հարցազրույցում Վիտալի Բալասանյանը մտահոգություններ է հայտնել Արցախի շուրջ ստեղծված իրավիճակի կապակցությամբ, անդրադարձել է 2018 թվականի ապրիլյան քաղաքական գործընթացներին՝ հայտարարելով, որ տեղի է ունեցել իշխանության բռնազավթում։ Բալասանյանը խոսել է նաեւ 2016 թվականին ՊՊԾ գնդի գրավման դեպքերից եւ անդրադարձել ՀՀ վարչապետ Նիկոլ Փաշինյանի եւ «Սասնա Ծռեր»-ի ներկայացուցիչներ Գարեգին Չուգասզյանի ու Ժիրայր Սեֆիլյանի միջեւ վերջերս տեղի ունեցած հանդիպմանը։

Սասնա Ծռերի անդամները 2016 թվականի հուլիսի 17-ին զինված հարձակում են գործել ՀՀ ոստիկանության Երևան քաղաքի վարչության պարեկապահակետային ծառայության գնդի վարչական շենքերի վրա. «ԿՌԱԶ» մակնիշի բեռնատարով հարվածելով՝ կոտրել են գնդի վարչական տարածքի մուտքի գլխավոր դարպասներն ու կից պարիսպը, իրենց մոտ ապօրինի պահվող ինքնաձիգների կիրառմամբ կյանքի և առողջության համար վտանգավոր բռնություն գործադրելով գնդում ծառայություն իրականացնող ոստիկանության աշխատակիցների նկատմամբ՝ ներխուժել են գնդի տարածք և զավթածն ազատելու պայմանով պետությանը գործողություն կատարելուն հարկադրելու նպատակով զավթել և պահել են գնդի վարչական շենքերը, շինություններն ու տարածքում գտնվող տրանսպորտային միջոցները: Ըստ մեղադրանքի՝ նրանց այս գործողության նպատակն է եղել ծանր հանցագործություն կազմակերպելու համար մեղադրվող Ժիրայր Սեֆիլյանին և մի շարք այլ անձանց ՀՀ արդարադատության նախարարության քրեակատարողական հիմնարկներից ազատ արձակելուն պետությանը հարկադրելը։

Զինված հարձակման հետեւանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը:

Աղբյուր` Փաստինֆո