Փաստ ինֆո

Մամուլի հրապարակումներիՀՀ գլխավոր դատախազությունը հոկտեմբերի 14-ին հանձնարարել է ստուգել ՍԴ նախագահ Հրայր Թովմասյանի ունեցվածքի թերի հայտարարագրման վերաբերյալ մամուլի հրապարակումները։ Այս տեղեկությունը «Փաստինֆո»-ի հետ զրույցում հաստատեցին ՀՀ գխավոր դատախազությունից։

Հարցին, թե ինչն է նման հանձնարարականի առիթ հանդիսացել՝ ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանն ասաց, որ հանձնարարականը տրվել է՝ հիմնվելով մամուլի հրապարկումների վրա։

«Մոնիթորինգով մեզ մոտ ֆիքսվել է, որ առկա է որոշ տվյալներ՝ գույքի հետ կապված։ Դա ուղարկվել է հետաքննության մարմին՝ հանձնարարականով, որ ստուգեն այդ տվյալները»,- նշեց Գոռ Աբրահամյանը։
Դատախազության այս հայտարարությանն արձագանքել է ՀՀ ՍԴ նախագահ Հրայր Թովմասյանը։ 168.am-ին տրված պարզաբանման մեջ Հրայր Թովմասյանն ասել է.

«Երբ օրեր, ամիսներ առաջ գրում էին, որ շուտով հերթը հասնելու է իմ դպրոցական տարիններին, ծիծաղում էի, հիմա՝ արդեն ոչ։ Երեկ կարդացի ինչ-որ վերլուծություն իմ գույքի վերաբերյալ, որն ինչ-որ լրատվամիջոցներ փորձեցին թիվ մեկ լուրը դարձնել։ Առաջին միտքը, որ առաջանում է, այն է, որ յուրաքանչյուրն իրենով է դատում, ու այստեղ ոչինչ անել հնարավոր չէ։

Իմիջիայլոց, սովորության համաձայն՝ ամեն ինչ փնթի է արված․ թվեր, տարիներ, փաստեր, «վրիպակներ», որոնք ինձ վերաբերվող նյութերում հետևողականորեն բազմանում են։ Առաջին հարցը, որ գալիս է․ ինչո՞ւ, ի՞նչ եք անում, ինչո՞ւ եք այդչափ փոքրոգի, ինչո՞ւ եք այդքան ճղճիմ, ինչո՞ւ եք բոլորին չափում ձեր արշինով։ Հասկացե՛ք, ձեզանից տարբերվող մարդիկ կան այս աշխարհում ու շատ»։

«Թե մինչև պաշտոնավարելը որտեղ եմ աշխատել, որքան եկամուտ եմ ունեցել, բոլորին է կարծես հայտնի, իսկ հանրային ծառայության անցնելուց հետո եկամուտներս միայն նվազել են։ Ինչ վերաբերվում է հարազատներից մեկի կողմից մի դստերը ավտոմեքենա, իսկ մյուսին՝ ավտոտնակ նվիրելուն, ապա ասեմ, որ այդ հարազատը մեր տանն է բնակվել 4-5 տարի և Միացիալ Նահանգներ ուսանելու մեկնելուց առաջ իր որոշումն է եղել այդ գույքը նվիրելը։
Իմիջայլոց, այդ տվյալները հայտարարագրված, հրապարակված են և գաղտնիք չեն։ Ինչ վերաբերվում է իմ բնակարանի կողքին գտնվող բնակարանին, ապա այո՛, դա տիկնոջս քրոջ բնակարանն է, որի ընտանիքը նախորդ դարի 80 ականներից չի ապրում Հայաստանում։ Բնակարանը գնվել է իմ առաջարկությամբ, և դա իրենց միակ սեփականությունը չէ Հայաստանում։

Պետք է հիասթափեցնեմ որոշ մարդկանց՝ ասելով, որ ամեն ինչ կիսատ է արվել։ Այս երկրի ներսում, առավել ևս՝ դրսում, շատ ազգականներ ու բարեկամներ ունեմ, որոնք Հայաստանում ու Հայաստանից դուրս տասնյակից ավել գույք են ձեռք բերել՝ և՛ մինչև իմ պաշտոնավարումը, և՛ այդ ընթացքում։ Կարծում եմ, ես հիմա պետք է միայն ուրախ լինեմ դրա համար, քանզի եթե «այդ ողջ գույքն իմն է», ապա ես տարածաշրջանի ամենահարուստ մարդկանցից եմ»,- նշել է Հ.Թովմասյանը:

Հեղինակ` Իզաբել Սահակյան