Փաստ ինֆո

«ՎԵՏՕ» շարժման նախաձեռնող Նարեկ Մալյանը ֆեյսբուքյան իր էջում գրել է, որ Կուբայից ժամանած թվով 14 տրանսգենդեր ՁԻԱՀ վարակակիր են. «Սա պաշտոնական աղբյուրներից ստացված տեղեկություն է»,-գրել էր Մալյանը։

«Փաստինֆո»-ն կապ հաստատեց Նարեկ Մալյանի հետ՝ հստակեցնելու որոնք են վերջինիս պաշտոնական աղբյուրները. «Պաշտոնական աղբյուրներ ունեմ տարբեր հիմնարկություններում, և իմ աղբյուրներն ինձ փոխանցեցին այդ ինֆորմացիան, որին ինձանից շատ ավելի լավ տիրապետում է ՀՀ միգրացիոն ծառայությունը։ Այսինքն այն, ինչ գրված է իմ ֆեյսբուքյան էջում, այդ ինֆորմացիային հստակ, պաշտոնապես տիրապետում է միգրացիոն ծառայությունը»,-ասաց Նարեկ Մալյանը։

Վերջինս նաև ընդգծեց, որ իր տեղեկություններով հուլիսին քննարկվել և մերժվել է ՀՀ-ում նրանց կացության իրավունք տրամադրելու դիմումը, հետևաբար նրանց կեցությունը Հայաստանում ապօրինի է։

Միգրացիոն ծառայության մամուլի խոսնակ Նելլի Դավթյանը «Փաստինֆո»-ի հետ զրույցում ասաց, որ 2019 թվականի 6 ամսվա կտրվածքով 19 անձանց վերաբերյալ հայց է եղել, որից հինգը մերժվել է. «Այս պահի դրությամբ որևէ հաստատում չունենք, իսկ մյուս դիմումները գտնվում են ընթացքի մեջ»,-ասաց Նելլի Դավթյանը։

Հարցին՝ արդյոք Հայաստանում ապօրինի կացության վերաբերյալ տեղեկություն ունե՞ն, թե ոչ, միգրացիոն ծառայության խոսնակը նկատեց. «Քանի դեռ նրանց հայցը քննման ընթացքում է, նրանց մնալն օրինական է։ Երբ մերժում ենք, նրանք երկու ամիս ժամանակ ունեն՝ բողոքարկելու։ Բողոքարկման ամբողջ ընթացքում կրկին նրանց մնալն օրինական է։ Բոլոր 3 դատական ատյաններով կարող է բողոքը գնալ, և այս ամբողջ ընթացքում մինչև վերջնական որոշում չլինի, նրանց Հայաստանում գտնվելն օրինական է»,-հավելեց Նելլի Դավթյանը։

Նշենք, որ Նարեկ Մալյանը նաև գրել էր, որ այդ տրանսգենդերներից մեկն աշխատում էր հացի փռում։ ՍԱՏՄ մամուլի խոսնակ Անուշ Հարությունյանը փորձել էր ճշտել ՝ որ հացի փռում է աշխատել նա, որպեսզի կարողանան այնտեղ վերահսկողական միջոցառումներ կազմակերպել. «Նա չի գրել հացի փռի հասցեն, ուղղակի ասում է, որ նրանցից մեկն աշխատել է հացի փռում։ Խնդրեցի, որ այդ փռի տեղն ասի, որպեսզի կարողանանք շատ արագ վերահսկողություն իրականացնենք»,-ասաց Անուշ Հարությունյանը՝ հավելելով, որ Նարեկ Մալյանն իրեն ուղղորդել է դիմել Միգրացիոն ծառայություն. «Միգրացիոն ծառայությունը թույլտվություն է տվել մարդկանց մուտք ունենալու, բայց արդյունքում, թե նրանցից որևէ մեկը որևէ տեղ աշխատում է, չի կարող իմանալ կամ կարող է, չգիտեմ, ամեն դեպքում գործընթացը երկար է տևում։ Կփորձենք միգրացիոն ծառայության միջոցով ճշտել,-հավելեց ՍԱՏՄ խոսնակը։

«Փաստինֆո»-ի հետ զրույցում Նարեկ Մալյանը պնդեց՝ տրասնգենդերները ՀՀ-ում աշխատանքային գործունեություն են ծավալում և այդ ամենը պաշտոնապես կարգավորվում է միգրացիոն ծառայության կողմից. «Տեղյակ են, որ այդ ՁԻԱՀ վարակակիր տրանսգենդերներից մեկը, օրինակ, աշխատել է հացի փռում։ ՍԱՏՄ-ին ուղղորդեցի միգրացիոն ծառայություն, որ ստանան իրենց բոլոր հարցերի պատասխանները»,-աաց Մալյանը։

Աղբյուր` Փաստինֆո